Кондак 1
Возбранный воине духовный в лике новых мучеников, / Прикамския страны утверждение, веси Култаевския похвало, / испроси всем к мощем твоим с молитвою прибегающим / в вере возрастания и недугов душевных и телесных исцеления, / да радующеся и Христа славяще, вопием ти: // Радуйся, священномучениче Николае, Пермския земли предивный молитвенниче.
Икос 1
Ангел покаяния в пустыни великий Предтеча / от младенства избра тя, священномучениче Николае, / да пути Христову люди научиши, / и к мученичеству себе самаго и чад духовных множество уготовиши, // темже Ангели на небеси славят житие твое сице:
Радуйся, душу твою во благодати Божественней утвердивый,
Радуйся, стопы твоя по словеси Евангельскому направивый.
Радуйся, род освященный увенчавый яко мученик Христов,
Радуйся, край отеческий прославивый яко угодник Божий.
Радуйся, ум и сердце в научение веры возложивый от юности,
Радуйся, труд и молитву во спасение ближних подъявый без лености.
Радуйся, терпение и надежду во основание подвигов положивый,
Радуйся, смирение и любовь яко венецдобродетелей стяжавый.
Радуйся, священномучениче Николае, Пермския земли предивный молитвенниче.
Кондак 2
Видя Православия премудрую красоту, / во образех чудотворных и благолепии церковнем являемую, / посреде церкве на всяк день чудными словесы воспеваемую, / от сродник же твоих в пределех Соликамских усердно тебе возвещаемую, // научился еси радостно Богу служити, поя Ему: Аллилуия.
Икос 2
Разум истины паче всех благ предпочет, внити во врата его потщался еси, / и люди с собою привести возжелел еси, Богу глаголя: Се аз и дети Тобою ми дарованныя, // от нихже ныне слышиши похвалы таковыя:
Радуйся, храм святый от младенства возлюбивый,
Радуйся, путь священнический во отрочестве избравый.
Радуйся, веру Христову в души возрастивый,
Радуйся, благость Божию в сердце познавый.
Радуйся, материю Церковию в вере воспитанный,
Радуйся, Отцем Небесным к служению уготованный.
Радуйся, чадом духовным учитель возлюблен явился еси,
Радуйся, старцем и юным наставник истинный нареклся еси.
Радуйся, священномучениче Николае, Пермския земли предивный молитвенниче.
Кондак 3
Силу духа в трудех церковных укрепляя, / к вышшей почести горняго звания востекл еси, / и с любовию сан иерейский приял еси, / в весь Калиновскую Промыслом Божиим направлямь, // во еже отцев Богу у престола Его пети: Аллилуия.
Икос 3
Имеяй произволение твердо неботечною лествицею шествовати, / ум в Священных Писаниих утвердил еси, / крепкою же мыслию служение Церкви Христовой избрал еси, / темже и мы житие твое, яко от силы в силу восхождение, // воспевати предначинаем сице:
Радуйся, яко во храме святителя Николая служению начало положил еси,
Радуйся, яко в добродетелех покровителю твоему небесному усердно подражал еси.
Радуйся, людем благочестивым явился еси в печалех радование,
Радуйся, отроком благоразумным преподал еси веры учение.
Радуйся, весь Калиновскую молитвою твоею освятивый,
Радуйся, храм Никольский попечением твоим благоукрасивый.
Радуйся, с супружницею твоею потрудился еси на ниве просвещения,
Радуйся, с паствою твоею укрепился еси на пути спасения.
Радуйся, священномучениче Николае, Пермския земли предивный молитвенниче.
Кондак 4
Бурею напастей житейское море видев воздвизаемо, / из глубины греховныя души изымати возжелел еси, / в весь же Култаевскую пришед, трудов рода своего священнаго продолжатель явился еси, / идеже благодати талант умножил еси, // поя на всяк день Всещедрому Богу: Аллилуия.
Икос 4
Слышавше благолепное служение твое / и слово пастырское, от мглы греховныя к свету призывающее, / стезями благочестия ходити навыкоша люди култаевстии, / и долголетно попечением твоим хранимии, // единеми усты возглашаху ти сице:
Радуйся, в весь, Предтечею хранимую, Божиею десницею приведенный,
Радуйся, иконою его, со Афона принесенною, православную паству одаривый.
Радуйся, прилежания пастырскаго ради дарами Духа озаренный,
Радуйся, трудолюбием учительским многи веси окрестныя просветивый.
Радуйся, разлучение с супружницею смертное яко временное вменивый,
Радуйся, бремя скорбьми отягченное яко легкое претерпевый.
Радуйся, горесть уныния отверг, добрых дел множество сотворивый,
Радуйся, будущих благ надежду обрет, к небу мыслию возлетевый.
Радуйся, священномучениче Николае, Пермския земли предивный молитвенниче.
Кондак 5
Боготечное житие смиренно шествуя, / веси Мулянския апостольски обхождал еси, / веси окрестныя словом Христовым окормляя, молитвою же и крестохождением утверждая, / темже и пастырем добр советник явился еси, / и Гамовскому иерею Александру путь святости предначертал еси, // с нимже на небесех ныне Богу поеши: Аллилуия.
Икос 5
Видев паству твою зело умножившуюся, о храме велием и благолепнейшем мысль приял еси, / со Предтечею апостол святых Петра и Павла / и Победоносца Георгия прием молебники и заступники, / и сим намерением небо ликовати подвигл еси, / и мир весь прикамский на труд и жертву призвал еси, // иже благодарственно ныне вопиет ти:
Радуйся, лучи любве отеческия прострый всем весем во уделе твоем,
Радуйся, снопы добродетелей христианских собравый на пажитех трудов твоих.
Радуйся, послушник архипастырей пребыл еси усердный,
Радуйся, наставник священников явился еси богопоставленный.
Радуйся, трудами неусыпными, молитвами и пощением паству твою умноживый,
Радуйся, делатели добрыя к подвигом и терпению тщанием твоим воздвигнувый.
Радуйся, намерение благое о храме нове во уме своем положивый,
Радуйся, любовь попечительную о создании его в сердце утвердивый.
Радуйся, священномучениче Николае, Пермския земли предивный молитвенниче.
Кондак 6
Проповедник богоносен жизни вечныя людем был еси, / сподвижника имеяй иерея Александра Култаевскаго, в помощь тебе Богом дарованнаго, / с сим и дело храмоздательства в веси твоей совершив, посреде скорбей воспел еси с надеждею: Аллилуия.
Икос 6
Возсиявый посреде веси Култаевския / крест честный на версех храма, тобою созданнаго, / в скорби сущия люди на подвиг укрепил есть / в бранном испытании, на Русь и весь мир пришедшем, / ты же яко воин Христов непоколебимый и утешитель верный, // услышал еси от них таковая:
Радуйся, память защитников России сохранивый,
Радуйся, страдание ураненных молитвою облегчивый.
Радуйся, сирых и вдовиц, в нуждах сущих, милосердный попечителю,
Радуйся, старых и юных, спасения ищущих, благодатный водителю.
Радуйся, Андронику, Перми святителю в ревности о Бозе подражавый,
Радуйся, от Феофана, Соликамскаго архипастыря во освящении храма нова обрадованный.
Радуйся, храм сей яко чудо веры пасомых твоих вменивый,
Радуйся, венец некрадомый, яко служитель Таин Святых Христовых, улучивый.
Радуйся, священномучениче Николае, Пермския земли предивный молитвенниче.
Кондак 7
Хотящим свободу разрушением Царства Российскаго улучити / пастырским дерзновением возбранял еси, / егда же торжество богоборцев приспе, / молитвы умножил еси, / себе уготовляя во испытаниих и скорбех // святыню души соблюдати, поя Богу: Аллилуия.
Икос 7
Новую главизну в жизни Церкве Русския собою открывая, / ПатриархВсероссийский, святитель Тихон благословил есть верныя на страдания, и сонм новых мучеников и исповедников пророчески возвести; // ты же, иерею Николае, ныне в лице их почитаемь, слышиши от всех похвалы сия:
Радуйся, яко страдание новомучеников слышав, гонений не устрашился еси,
Радуйся, яко моление о страдальцех приносити на всяк день потщался еси.
Радуйся, угасивый в веси твоей огнь братоубийства словом кротости,
Радуйся, уготовавый люди твоя на защиту святыни и подвиг верности.
Радуйся, вослед священномучеником Андронику и Феофану к Небесем тещи восхотевый,
Радуйся, восшествием преподобных Белогорских и иереев Пермских к Богу душу окрыливый.
Радуйся, яко с народом Божиим на Голгофу взойти уготовился еси к Живоносному Древу,
Радуйся, яко со иереем Александром клас зрелый соделался еси Небесныя нивы.
Радуйся, священномучениче Николае, Пермския земли предивный молитвенниче.
Кондак 8
Странствие вменив земное все житие, / крушение же Отечества оплакав, / бодрено уготовился еси во Отечество Небесное шествовати, / темже за имя Христово тяжкия муки претерпевая, // Богу благодарно взывал еси: Аллилуия.
Икос 8
Весь от главы до ногу ранами уязвен был еси, / егда погнаша тя мучители удела твоего последнее обхождение совершити, / кровию своею землю Култаевскую, яко слезами покаяния оросил еси, мученическое благовестие мучителем твоим преподал еси, // в руце же Божии душу свою возложив, пения ангелов сподобился еси, воспевающих сице:
Радуйся, нищету духовную, плач о гресех и кротость стяжавый,
Радуйся, милости к людем, благости Христовы и правды взалкавый.
Радуйся, яко сердце чистое твое крепостию древних мученик исполнися,
Радуйся, яко к сыном Божиим, мир утверждающим, имя твое сопричтеся.
Радуйся, яко прехождение твое во узах из веси в весь бысть за правду изгнание,
Радуйся, яко раны многи на телеси, мечем прободенныя, быша за веру страдание.
Радуйся, в ланиту прободение приемый, подобник был еси Спасу твоему,
Радуйся, на небо восхождение совершивый, в святости предстал еси Богу твоему.
Радуйся, священномучениче Николае, Пермския земли предивный молитвенниче.
Кондак 9
Всякое житейское попечение отринувше, / благодарно в дому Божии священномученика Николая прославляем, / храма своего и по смерти разлучитися не хотяща, / но упокоения близ алтаря сподобившася, / и оттуду мощми своими нам дивно просиявша, // поющим в радости: Аллилуия.
Икос 9
Ветийствовати кто возможет похвалы достойныя доблим мучеником, / в нихже просиял еси, отче Николае, с сослужителем твоим иереем Александром, / обаче святость жития вашего и высота подвига мученическаго // побуждают нас пети сице:
Радуйся, яко с добрым сомолитвенником твоим к мучению за Христа уготовился еси,
Радуйся, яко с сонмом новомученик Пермских за веру страдания сподобился еси.
Радуйся, овча стада Христова, закланное за истину непорочную,
Радуйся, каменю града Божия, сияяй добродетелию светоносною.
Радуйся, крестом иерейским достойно и по смерти украшенный,
Радуйся, правду Евангельскую житием и кончиною явивый.
Радуйся, в сражениих противу страстей воителю добропобедный,
Радуйся, в страданиях от болезней утешителю терпеливый.
Радуйся, священномучениче Николае, Пермския земли предивный молитвенниче.
Кондак 10
Спасти хотя люди Своя Христос, в коемждо роде святыя воздвизает, / яко молитвенники и помошники в нуждах благодатныя, / сего ради во обретении чудотворных мощей твоих, отче Николае, / весь Култаевская и вся земля Пермская тя воспевает, // и вся Церковь Русская о тебе песнь хвалебную Богу взывает: Аллилуия.
Икос 10
Стену алтарнаго храма твоего надгробие имеяй, / великих ради пастырских трудов твоих, / обретением цельбоноснаго тела твоего утешил еси людей, сшедшихся в радость сию, // иже со удивлением и радостию воспеша сице:
Радуйся, о почитании твоем пекущихся не посрамивый,
Радуйся, во обретении твоем верныя возвеселивый.
Радуйся, светильниче уделов Пермских, на свещнице возсиявый,
Радуйся, молитвенниче, силу свою в милости показавый.
Радуйся, яко спящия сном греховным к подвигом бодренно возставил еси,
Радуйся, яко недугующия грехи многими от погибели духовныя избавил еси.
Радуйся, изшествием из земли тела твоего показавый образ будущаго возставления,
Радуйся, явлением людем мощей твоих подавый надежду вечнаго спасения.
Радуйся, священномучениче Николае, Пермския земли предивный молитвенниче.
Кондак 11
Пение молебное приими, священномучениче Николае, / и молитву нашу о себе самех и о ближних наших услыши, / твои бо наследницы всебогатии есмы, / храм, тобою созданный и мощи в нем святыя твоя имуще, // темже глас радости приносим присно: Аллилуия.
Икос 11
Светоприемныя светильники чада твоя духовная покажи ны, / светозарный мучениче и пастырю наш кроткий, / настави нас во истине Христовой ходити, / и о храмех наших попечение усердно творити, / наипаче храмы душ наших чисты Христу уготовити, // таковаго имуще заступника, емуже вопием:
Радуйся, веси Култаевския добрый хранителю,
Радуйся, спасения нашего усердный рачителю.
Радуйся, мощми твоими и благодатию с нами пребываяй,
Радуйся, попечение твое и любовь верным являяй.
Радуйся, истины Христовы твердый ревнителю,
Радуйся, врагов наших светлый борителю.
Радуйся, исцелений сокровище наше неоскудеваемое,
Радуйся, спасения знамение, верным подаваемое.
Радуйся, священномучениче Николае, Пермския земли предивный молитвенниче.
Кондак 12
«Благодать возсия, идеже множайший процвете грех», / сице глаголет земля Пермская многострадальная, / кровь многих мученик в годину гонений приявшая, / ныне же мощи их из недр своих издавающая, / и хвалами прославльшему их Богу оглашаемая, // внегда пети верным: Аллилуия.
Икос 12
Поюще дивныя во святых и в сонме новомученик изрядныя, / пастыри добрыя церкви Предтечевы Николая и Александра, / научимся неколеблемому в вере их стоянию, / да посреде лютых обстояний и испытаний тяжких // не престанем благодарно взывати:
Радуйтеся, покаяния проповедницы, пред годиною гонений люди укрепившии,
Радуйтеся, мученичества образи, страданьми за Христа Церковь украсившии.
Радуйтеся, повестию жития твоего светлаго всегда нас вдохновляющии,
Радуйтеся, молитвою сострадания кроткаго в бедах нас утешающии.
Радуйтеся, яко вещание исправлений ваших изыде во страны Церкве Русския,
Радуйтеся, яко благодать помощи вашея ороси сердца людей верных.
Радуйтеся, люди многи воспитавшии, достойныя Царствия Небеснаго,
Радуйтеся, паству свою ведущии стезями спасения вечнаго.
Радуйтеся, священномученицы Николае и Александре, Пермския земли предивнии молитвенницы.
Кондак 13
О, доблий учителю паствы богодарованныя, / похвало Култаевская, священномучениче Николае, / приими молебное пение чад твоих, / о всех милостех твоих благодарение приносящих, / и предстоя ныне с новомученики престолу Святыя Троицы / с сослужителем твоим иереем Александром и ученики многими, / молися укрепитися нам на подвиг предлежащий, / егоже прошедше возможем пети на небесех с тобою: / Аллилуия, аллилуия, // аллилуия.
Молитва
О, священномучениче Николае, веси Култаевския иерею трудолюбнейший, земли Пермския молитвенниче усердный, чад Церкве Русския скорое услышание и всех притекающих к мощем твоим целителю отраднейший! Приими моление наше и пение благодарственное, храм бо тобою созданный и от бури безбожия пречудно сохраненный, имамы яко свидетельство огненныя ревности твоея о славе Божией и о спасении душ христианских. Темже молим тя, помози пастырем земли нашея Пермския воздвизати храмы новы и совершати во имя Господа труды подвижническия, людем же в вере возрастати и о очищении сердца попечение прилагати; и всем нам, с любовию мощем твоим покланяющимся, подаждь избавление от недугов душевных и телесных, и исполни всякое на пользу духовную прошение, да непреткновенно шествуя путем спасения, достигнем вси Небеснаго Царствия, и тамо с тобою прославим в Троице покланяемаго Бога нашего, Отца и Сына, и Святаго Духа, ныне и присно и во веки веков. Аминь.