Священномученику Николаю Култаевскому
На велицей вечерни
На Господи воззвах, стихиры, глас 6, подобен: Все отложше:
Свет неприступный, / кротце на земли возсиявый, / Христос слово вечное миру возвести, / Емуже ты последовал еси, отче Николае, / и тако просветился еси, / якоже и неведущих к свету истины приводиши, / и заблуждших из тьмы исхищаеши, / и мощми твоими земли Пермския освящаеши концы, / нам же, в праздник твой сошедшимся, / освящение и просвещение испрошаеши, // и спасение душам нашим.
Дар богоданный, / мзду трудом твоим стяжал еси / учити правой вере во Христа / люди твоя, отче Николае, / темже неленостно веси обходя, / Духа росу в сердца верных низводил еси, / огненною ревностию апостольскою исполнен; / научи и нас радостно совершати / труд спасения нашего / и подавати помощь ближним нашим на земли, // да приимем от Бога велию милость.
Крест Живоносный / на персех яко святыню обнося, / той возжелев воздвигнути в веси твоей / на версе храма, яко светильник на свещнице, / сего ради многолетно потрудился еси, / и воздвижен бысть храм Божий, / яко град на горе святей стояй, / гласом звончатым к свету Христову вся призывая, / да услышат пение словес церковных / удолия и холми, и окрестная селения земли Пермския, // яже ныне благодарно тя прославляют.
День невечерний, / будущаго века торжество / умом и сердцем зрети желая, / земная наслаждения презрел еси, / трудолюбное житие возлюбив и страдание / апостолов, мучеников и преподобных, / имже молился еси от юности словесы церковными, / и тех благодатей приобщився, / во свете вечном ныне ликуеши; / помяни и нас, отче, // пред Престолом Божиим.
Ины стихиры, глас 5, подобен: Радуйся:
Радуйся, верных множество, / в память сошедшеся мученика честнаго,/ иерея Божия Николая, / добре в житии подвизавшася, / и мук за Христа сподобившася / в годину испытаний Церкве Русския, / и чаши страданий приобщившася / многих первомученик земли Пермския: / архипастырей своих Андроника и Феофана, / иереев, собратий и сослужителей, / и учеников, имже благовествова неустанно; / тех молитвами, / вера наша да умножится // и любовь да укрепится.
Радуйся, ниво церковная, / класы зрелыя возрастившая / в веси Култаевстей Пермския земли, / пастыри и мученики изрядныя: / Николая трудолюбнейшаго / и Александра того сподвижника, / иже Евангелия последователие теплейшии суще, / слово Христово уясниша: / аще зерно пшенично пад на земли не умрет, / едино пребывает, / аще же умрет, плод сотворяет, / души верою спасенныя; / темже страдальцы песньми ублажим, // за други своя живот положившия.
Радуйся, земле благодатная, / благословение святителя Стефана наследствовавшая, / святителей и преподобных труды освященная, / и новых мученик кровию обагренная, / ихже и возрастивши, / память оных усердно почитаеши, / и в день сей священномученика Николая / песни тому приносиши, / яко молитвеннику за люди твоя, / и целителю душ и телес отраднейшему, / юных воспитателю, / сирых и вдов утешителю, / храма созидателю и учения хранителю, // многим радость подавающему.
Радуйся, Церковь Русская, / веселящися о святых своих, / яко мати о чадех благоразумных, / Престолу бо Владычню во славе предстоят, / в нихже Пермския земли подвижницы просиявают, / веры Христовы семена в ней насадившии, / и плоды ея хранити потщавшиися / трудами проповедническими и служением церковным. / Темже великий во иереех Пермских да ублажится, / Николай священномученик, / Култаевския веси похвала, / мощи своя нам явивый яко дар многоценный, / к нимже припадающе Бога молим // душам нашим в мире спастися.
Слава, глас 6:
Пути страданий Христовых последовал еси, / священномучениче Николае: / приял бо еси вместо бичевания язвы оружныя, / вместо поругания еже во узах весей обхождение, / вместо гвоздей и копия в ланиту смертоносное ударение, / но вся сия кротце претерпел еси, / и сопричтался еси лику новых мучеников, // со Агнцем Божиим царствующих во веки.
И ныне, Богородичен, глас тойже: Кто Тебе не ублажит.
На литии стихиры
Глас 1:
Восхвалим, вернии, песньми светлое торжество / священномученика Култаевскаго Николая / и сподвижника того иерея Александра, / жизнь свою за веру во Христа положивших, / да молитвами их научимся / сердца земным страстем не прилагати, / да небесное богатство наследствуем, // молитвами святых с небесе подаваемое.
Глас 2:
Пермская земле, святынь православных хранительнице, / отечество святителей, мученик и преподобных, / взыграй о чадех твоих, ныне в Церкви воспеваемых, / иереех Божиих Николае и Александре, / в веси Култаевстей добре потрудившихся, / и в годину гонений за Христа страдати сподобившихся, / да молитвами их приведутся Богу чада света новая, // паче всего в мире Бога и ближняго возлюбившая.
Слава, глас 3:
Коль добро и коль пред Богом красно / в самобратней любви пребывание святых мученик! / Тии бо службу Божию во храме купно сотворявше, / купно и к страданию уготовани явишася, / и в лето едино страшное и грозное пострадавше, / ныне светло прославляются, // яко дерзновение мученическое имущии молитися о душах наших.
И ныне, Богородичен, глас тойже: Без семене от Божественнаго Духа.
На стиховне стихиры, глас 8.
Подобен: О, преславнаго чудесе:
О, доблий страдальче Христов, / священномучениче Николае! / Раны твоя, яже претерпел еси, / яко камение драгоценное сияют, / венец украшающе мучения твоего, / надежду же спасения нам возвещающе; / темже молим тя: / испроси нам в вере утверждение, // да в час испытания не устрашимся.
Стих: Священницы Твои облекутся в правду, // и преподобнии Твои возрадуются.
О, мудрый наставниче верным, / иерею Божий Николае, / просвещения ради людей твоих / бодренно потрудивыйся с любовию усердною! / Кое благодарение тебе принесем, / храм прекрасен во имя Предтечи Господня нам создавшему, / и близ него от трудов и мучений покой обретшему, / и по многих летех // мощми твоими отонуду миру возсиявшему?
Стих: Честна пред Господем // смерть преподобных Его.
О, теплый заступниче наш, / пастырю добрый Николае! / Призри с высоты на люди твоя, / память твою песньми почитающия, / и прошения наша о ближних исполни, / да на путь святаго жития обратятся, / и нам, песнословцем твоим, даруй / в делех благоразумие, в молитве крепость, // пастырем послушание и Богу присвоение.
Слава, глас 4:
Неизреченная радость с небесе возсия нам! / Дар Божественный и пречудный в земли Пермстей явися, / святыя мощи чудотворныя и целебныя / священномученика Култаевскаго Николая, / храм бо души его освятися / подвиги многими и молитвами, / и страданием во имя Христа Бога нашего, / сохраньшаго сей долголетно тлению непричастен / и храм Предтечев даже и до днесь от разрушения неврежден соблюдшаго, // пастырем сим святым созданный во спасение наше.
И ныне: Богородичен, глас тойже: Призри на моления.
Тропарь, глас 2:
Добраго жития деяния светлая / в кротости и премудрости совершив, / венец победный мученический приял еси, иерею Николае, / веси Култаевския священная похвало / и Пермския земли честное украшение: / в храме бо Предтечи, тобою созданном, мнози обретают спасение, / мощи же твоя, чудесно явленныя, цельбу источают // всем благодарно чтущим святую память твою.
На утрени
По 1-м стихословии седален, глас 3.
Подобен: Божественныя веры:
Божественных дарований благодатию, / Церковь сокровище тя во священницех показа, / проповедника неусыпнаго и утешителя милосерднаго, / благолепия церковнаго ревнителя и страдальца за Истину. / Священномучениче Николае, Христа Бога моли // к деланию доброму воздвигнути души наша.
И ныне: Богородичен, глас тойже:
Божественная книго одушевленная, / Мати Божия, просвети души наша, / да Евангелие возлюбим Сына Твоего, / еже нам проповедаша вернии раби Твои, / в нихже почитаем ныне Николая и Александра священномучеников, // молящихся о душах наших.
По 2-м стихословии седален, глас 5.
Подобен: Крест Господень похвалим:
Кресту Честному покланяяйся, отче Николае, / понесл еси терпеливно крест жития твоего, / супружницы лишение, / труды проповедническия и скорби пастырския, / муки от рук воинов неправых, безбожием помраченных, // но во всех сих Свет вечный тебе возсия.
И ныне: Богородичен, глас тойже:
У Креста Сына Твоего, Богомати, / предстояла еси с верным учеником Его, / тогоже и усыновила еси Божиим велением; / и ныне нас облагодати, / празднующих память вернаго ученика Господня иерея Николая, // сынове и дщери бо Твои есмы, Благодатная.
Величание:
Величаем вас, / святии священномученицы Николае и Александре, / и чтем честная страдания ваша, / яже за Христа // претерпели есте.
Псалом избранный:
1. Священницы Твои облекутся в правду, и преподобнии Твои возрадуются.
2. Господи, возлюбих благолепие дому Твоего и место селения славы Твоея.
1. Молитвы моя Господеви воздам пред всеми людьми Его, во дворех дому Господня.
2. Уста моя возвестят правду Твою, весь день спасение Твое.
1. Приидите, чада, послушайте мене, страху Господню научу вас.
2. Блажен муж, иже не иде на совет нечестивых.
1. Умножися на мя неправда гордых.
2. Обышедше обыдоша мя, и именем Господним противляхся им.
1. Господь утверждение мое и прибежище мое, избавитель мой, Бог мой, помощник мой, и уповаю на Него.
2. Пролию пред Ним моление мое, печаль мою пред Ним возвещу.
1. Аще и пойду посреде сени смертныя, не убоюся зла, яко Ты со мною еси.
2. Благословен Господь Бог Израилев, творяй чудеса Един, и исполнится славы Его вся земля.
По полиелеи седален, глас 8.
Подобен: Воскресл еси:
Воскресения из мертвых чающе, Николай и Александр священномученицы / гнева адскаго мучителева не убояшася, / но вся претерпевше, к небесем возлетеша, / и ныне со дерзновением молятся // в вере Троической нам утвердитися.
И ныне: Богородичен, глас тойже:
Милости многия явила еси на нас, Пресвятая Дево, / и ныне паки милость Свою нам посылаеши, / служители бо вернии Твои иереи Николай и Александр, / пред иконами Твоими в житии о людех усердно молящиися, // с Тобою молят Сына Твоего нам в мире спастися.
Прокимен, глас 4: Священницы Твои облекутся в правду, / и преподобнии Твои возрадуются.
Стих: Воспойте Господеви песнь нову, хваление Его в Церкви преподобных.
Всякое дыхание: Евангелие от Иоанна, зачало 36.
По 50-м псалме стихира, глас 6:
На земли основа Господь Церковь Свою, / и проповедники Своя настави / по образу прежде единаго храма Иерусалимскаго устроити / многи храмы во языцех, прежде Бога не ведевших, / во еже тамо пребывати имени Его, / тамо вселитися и жити Ему посреде людей Своих, / и милостивно послушати молитвы их; / темже ревность о Доме Божии прииде в сердце иерея Николая, / храм в веси Култаевстей во времена скорби устроившаго, / иже неврежден сохранився, доныне пребывает, // на моление благодарственное воздвизая души наша.
Канон, глас 8
Песнь 1
Ирмос: Песнь возслем, людие, / чудному Богу нашему, / свободившему Израиля от работы, / песнь победную поюще и вопиюще: // поим Тебе, Единому Владыце.
Песньми прославим, вернии, / святаго Николая пресвитера, / единаго от Пермских новых мучеников, / в Дусе и истине добре послужившаго // в Троице покланяемому Единому Владыце.
Припев: Святый священномучениче Николае, моли Бога о нас!
Отрасль благочестиваго корене, / священнаго рода избранный плод / отрок благоразумен показася, / сродники своими в добродетелех наставляемый // почитати Христа, Всеблагаго Владыку.
Посреде трудолюбных сословий / издетска пожил еси, / сострадати им научаемый / пастырьми добрыми рода твоего, // усердно служащими Единому Владыце.
Землю Пермскую отчую / от юности возлюбил еси, святе Николае, / яко удел Стефанов избранный, / святителями Питиримом и Герасимом возделанную ниву благоплодную, // и Ионою собранную жатву Владычню.
Богородичен: От неплоднаго корене / явилася еси, Богородице Чистая, / яко плод небесныя чистоты исполнен, / от праведников пречудных Иоакима и Анны, // благоугодивших Единому Владыце.
Песнь 3
Ирмос: Утверждей в начале небеса разумом / и землю на водах основавый, / на камени мя, Христе, заповедей Твоих утверди, / яко несть свят // паче Тебе, Едине Человеколюбче.
Возлюбивый род наш даже до смерти Крестныя Господь / любящия Того воздвизает / пасти словесныя овцы жезлом спасения вечнаго; / сей крест избрал еси, отче Николае, // яко избранник Христа Человеколюбца.
Оханских предел люди наставил еси в вере православней, / во Осинстей же веси Калиновстей путь священства начен усердно, / окрестных селений учитель изряден показался еси, / добру помощницу в трудех имеяй супругу благочестивую Анфию, // утешение же в трудех паству боголюбцев.
Святителя Николая стяжавый небеснаго в трудех помощника, / в весь Предтечеву Култаевскую преходиши, / яко на степень горы Голгофы восходя, / и тамо яко апостол всем присный бываеши, // грешником кающимся и верным христолюбцем.
Древяней церкви Култаевстей реченное во освящении ея: / «о любезный храм Божий! / да будет стояние твое на месте сем твердо во веки!» / яко завет собратий старец приял еси, отче Николае, // служа усердно людем и Богу Человеколюбцу.
Богородичен: Взыграся младенец во утробе прежде неплодней / сретения ради Тебе, Богоотроковице, / взыграшася же людие култаевстии мали и велицы / в сретение иконы Усекновения Предтечева, пастырем их принесенныя // от удела Твоего, Мати Человеколюбца.
Седален, глас 4.
Подобен: Светлую Воскресения проповедь:
Светоносную Православия проповедь / всем житием твоим явил еси, / словом Евангелие возглашая, / чудесы преображения душ верныя удивляя, / попечение о сирых и убогих прилагая; / темже во всем искусен явился еси // спасати души наша.
И ныне, Богородичен:
Милующаго Милостивая Мати,/ умилосердися о рабех Твоих, / пред иконою Твоею моления приносящих, / избавления ищущих от скорбей суетнаго века сего, /воспомяни нам житие крестное и страдания новых мучеников, / да ум горе вперивше, взываем: // сих наследники нам быти помози, Пречистая.
Песнь 4
Ирмос: Услышах, Господи, / смотрения Твоего таинство, / разумех дела Твоя, // и прославих Твое Божество.
Во еже Господа прославити / труды ко трудом приложил еси, / попечение подъем о храме благолепнем, // идеже вселится Христово имя и Божество.
Апостолов верховныя имея помощники, / Георгия великомученика в защитники призвав, / людем култаевским в храмоздательстве показал еси // ревность во еже славити Божественное Существо.
Многолетный подвиг понесл еси, / архипастыри Пермскими благословляемь, / людем храм создати, идеже воспоется // всесильное Христово Божество.
Ковчег спасения Церковь нарицают, / кораблец же апостольский в мори житейстем; / темже воспеша строители култаевстии // освящения храма их радостное торжество.
Богородичен: Радуется Матерь Божия, / храмов здательству, в нихже души обновляются, / Рождеством Своим обновившая // человеческое падшее естество.
Песнь 5
Ирмос: Вскую мя отринул еси / от лица Твоего, Свете незаходимый, / и покрыла мя есть чуждая тьма окаяннаго, / но обрати мя, и к свету заповедей Твоих // пути моя направи, молюся.
Паству култаевскую богослужением укрепил еси / пред лицем испытаний земли Русския, / со крестом и иконы хождением веси освящая, / люди же учением в вере укореняя, Христу взывал еси: // ихже дал еси мне, настави ко спасению, молюся.
С супружницею разлучився оныя смертию, / делание к небу возводящее многоусугубил еси: / бдение, молитву, пощение и о людех своих попечение, / и пастырей наставник явился еси, Богу рекий: // не оставити нам путь крестный, Господи, помози, молюся.
Иерея Александра помощника обрет, / сироты и вдовицы ратников, в годину бранную изгибших, препитал еси, / еще же поревновал еси о благочестии, от крамольник колеблемем, / Богу на всяк день взывая: // от нощи утреневав, Тебе молюся.
Дивный храм, всем миром во мнозех летех зиждемый, / в год горести Святыя Руси в земли Пермстей возсия, / в горнило гонений ввергаемым победу жизни проповедуя, / о нихже взывал еси, отче Николае: // молящихся в храме сем услыши, Господи, молюся.
Богородичен: Скорбный лик Богоматере людем проповеда / мучение от глада, смуты и брани междоусобныя, / но сие бысть овым во исправление жизни греховныя, / овым же праведныя славы венец, // имже яко новомучеником нашим молимся.
Песнь 6
Ирмос: Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися, / и молюся яко Иона, // от тли, Боже, возведи мя.
Новое чудо, храм култаевский / архипастырь Пермский Андроник видев, / радости исполнися о людех, веру хранящих, / о пастыре Николае, сих воспитавшем, и сподвижнице его иерее Александре, / ихже прежде мученичества благослови, Богу глаголя: // с сими священству истинну в будущем веце сопричти мя.
Феофан, святитель Соликамский, / освяти с тобою, отче Николае, селение Богу Вышнему, / храм Предтечев, яко град верху горы стояй, / яко светильник на свещнице поставляемый, / небу грозному над Пермским краем простерту, и глагола: // о пребывании храма сего до века молящагося, Боже, услыши мя.
Егда междоусобныя брани огнь Перми достиже, / восста брат на брата и чада на отцев своих, / ты же, отче Николае, сердцем сокрушенным, / молитвы во храме твоем с верными возносил еси / о чадех Церкве заблуждших, красоты и правды Божия отметающихся: // от ослепления лестию безбожною, Владыко, избави их.
Наказание Божие, землю Русскую постигшее / в годину браней, смут и гонений, / вопль мног, рыдание и сетование воздвиже / в душах пастырей народа православнаго: / како отщетися целожизненнии труды наши, // но Распныйся за мир, на мученичество укрепи ны.
Богородичен: Мати Божия, рода царскаго на Руси Хранительнице, / и всех людей усердная Заступнице, / виждь, како ниспровергаются устои вековечныя / Руси, Христу зело возлюбленныя, / горце взывал есть иерей Николай, иже от веси Култаевския, // темже на мученичество за веру укрепи мя.
Кондак, глас 5:
Святых Таин кроткий совершителю, / веры ревностный проповедниче, / паствы добрый учителю и защитниче небоязненный, / пастырю Култаевский, священномучениче Николае, / в годину гонений многия муки и смерть за Христа претерпевый / со иереем Александром, сподвижником твоим, / и храм дивный наследие нам оставивый / во свидетельство огненныя любве твоея ко Господу, // Того моли даровати нам велию милость.
Икос
Един от тьмы тем жертв брани междоусобныя, / и от многаго множества страдалец за веру православную, / священниче Божий Николае, / земли Пермския заступниче усердный и богоприятный, / прииди и стани с нами, праздник твой совершающими, / ихже облагодатствовал еси многащи исцелений чудесы, / от мощей твоих богатно изливаемыми, / и испроси стране нашей мир и безмятежие, / да многая чада новая Церкве Христовы возрастут в познание Истины, / и да прозябнут добродетелей плоды в душах людей православных, // молящихся всегда Господу даровати им велию милость.
Песнь 7
Ирмос: Безумное веление / мучителя злочестиваго люди поколеба, / дышущее прещение и злохуление богомерзкое, / обаче три отроки не устраши ярость зверская, / ни огнь снедаяй, / но противодышущу росоносному духу, / со огнем суще пояху: // препетый отцев и нас Боже, благословен еси.
Рекл еси, отче Николае: / кто испишет страдания земли, братоубийством растерзаемыя, / кто воспоет по достоянию сияние славы / Андроника, святителя ревностнаго, / жива в земли погребеннаго, / Феофана же, архипастыря милосерднаго, / речное истопление в муках приимшаго, // во убиении взывавших: Боже, благословен еси.
Ужасеся душа твоя, / пастырю кроткий, отче Николае, / извещению о убиении Государя православнаго, / страданием Царственнаго Дому его, / кончине мученической множества иереев пермских и кунгурских, / осинских, оханских, и чердынских, / еще же и монахов белогорских, // яко отроцы посреде пещи взывающих: Боже, благословен еси.
Не трости, ветром колеблемыя, / явилися есте, пастыри култаевстии, / отцы Николае и Александре, / но якоже Предтеча к покаянию путеводителие / чадом вашим духовным, / и якоже оный бысть первый мученик Завета Новаго, / такожде и вы, в первыя годы гонений на Руси // к мученичеству уготовленнии, воззвасте: Боже, благословен еси.
Пастыри, ихже добре окормлял еси, / отче отцев Николае, / к страданию восходяще, / заветы твоя воспомянуша; / о, кий страх бысть тогда, солнцу померкшу, / земли помрачившейся и рекам окровавленным, / кампаном набатно взывающим: // пощади люди Твоя, Боже, Ты бо во веки благословен еси.
Богородичен: Не тельцы, но жертвы одушевленныя, / не овни, но всесожжения словесная / приведошася Сыну Твоему / вслед Тебе, о Богомати, / яко преискренне Тебе возлюбившии, / и единодушно в церкви пребывающии, / Тебе на всяк день воспевающии: // Спаса душ наших Рождшая, благословена еси.
Песнь 8
Ирмос: Мусикийским органом согласующим, / и людем безчисленным покланяющимся образу в Деире, / три отроцы не повинувшеся, / Господа воспеваху, // и славословляху во вся веки.
Любовь твоя пастырская, подобная Христове любви, / последнее испытание прият, егда на муки ведоша тя людие, / вид и злонравие демонское имущии, / ты же о погибели онех сетуя горце, Богу взывал еси: // не даждь сим, Отче, погибнути во веки.
Белоснежною пустынею из веси в весь, / в нихже веру проповедал еси, уча людей своих, / шествие предначал еси, удареньми предательскими мечными побуждаемь / к скорейшему течению // в Царствие Бога, Создавшаго веки.
Яко жертвенное приношение, / кровь излиял еси из ран многих; / яко Христос, за мир закланный, остном прободен был еси, / заушением же в ланиту мечным смерть приял еси, // в лице мученик водворивыйся с Богом во веки.
Узревше тя мертва, снежными пеленами покровена, / плач подъяша чада духовная; / у храма, егоже создал еси, тя погребоша, / пение же надгробное сотвориша, // упокоения тебе испрошающе во веки.
Богородичен: Усыновившая род человеч, / Дево, христианом Заступнице, / подаждь стране Российстей в вере утверждение, / да никтоже возможет руку подъяти на пастыри Церкве Божия, // юже врата ада не одолеют во веки.
Песнь 9
Ирмос: Ужасеся о сем небо, / и земли удивишася концы, / яко Бог явися человеком плотски, / и чрево Твое бысть пространнейшее небес. / Тем Тя Богородицу // ангелов и человек чиноначалия величают.
Служители Господни, / иерее Александр Култаевский и Александр Гамовский, / Павел и Григорий Мокинстии и инии многи, / имже был еси овым брат во Христе и сослужитель, / овым же наставник духовный, отче Николае, // якоже ты мученичеством Неба достигоша, идеже Христа величают.
Страж храма твоего и по смерти явился еси, / в земли телом лежащ, поругану сему быти никакоже дозволил еси, / ниже разрушену руками безбожных, / на небеси же пребываяй духом / о нас, молящихся тебе, пещися не престаеши, // да радостно во Христе со благодарением живуще, Того величаем.
Колико прежде сетовала есть Пермская земля, / толико ныне празднует дни новых мученик своих, / днесь же сугубо торжество явися: / мощи бо твоя, пречудно явленныя, отче Николае, / точат исцеления душ и телес // всем, иже верою память твою величают.
Священномучениче славный, Николае, / Култаевская похвало и земли Пермския украшение, / младенцем ея питатель буди, / отроком же учитель терпеливнейший, / всем страждущим кроткое утешение // и радование всем, иже тебе величают.
Богородичен: Милость Твоя безмерна, о Богомати, / молитвами бо Твоими к Сыну Твоему / являются мощи святых грешному роду нашему, / яко крупицы златыя, от песчаных гор многолетно измываемыя, / темже сподоби нас верных быти // заветом новомученик святых, ихже величаем.
Светилен:
Подобен: Учеником зрящим Тя:
Ученик Христов быти возжелев, / Тому последовал еси, добрый пастырю Николае, / и к мученичеству пришед, Богу взываеши, / да молитвы людей Своих приимет, / и путем крестным и радостотворным возведет / к начальному Свету славы.
И ныне, подобен тойже:
От ученика Христова, приявшаго Тя в дом свой, / облагодетельствована была еси по распятии Господнем, / всему миру благодеющая Мати Божия, / темже иереем, апостольскаго преемства благодатию почтенным, / яко учеником Христовым, пособствуй востещи / к начальному Свету Божественныя славы.
На хвалитех, глас 1.
Подобен: Небесных чинов:
Крест священства приемый, / на раменах овчата заблуждшая носил еси, / еще же скорби и раны духовных чад твоих, / последи же ударения мечная злобы мучителей; / во всех сих Христу уподобился еси, // с Нимже в вечном Свете ликовствуеши.
Приими, Христе Боже, дух мой, / рече иерей Николай многострадальный, / на землю остном железным поверженный, / и ударение смертное в ланиту приемый, / во всех сих мучеником древним уподобився, // ангельским ликом сочетася.
Шествием мученическим последним селения прошед, / в нихже прежде апостольски проповедал еси, / погреблся еси под покровом снежным, / и тамо обретенный чады твоими, / пением надгробным провождаемь, водворился еси // в селениих Божественныя Светлости.
На небеси и на земли радость возсия / в явлении мощей священномученика Николая, / емуже пение приносяще, / утешение приемлем молитвами пастыря милосерднаго, / на радость ближним своим на земли пожившаго // и радостно милости с небес всем источающаго.
Слава, глас 8:
Велия есть святых мученик благодать, / ум бо вперивше в век безконечный, / раны телесе смертнаго нивочтоже вмениша; / темже радуйся, весе Култаевская, / о пастырех твоих Николае и Александре священномученицех, / и вся земле Пермская, веселися / в настоящем их торжестве, // просвещающем Светом вечности души наша.
И ныне, Богородичен, глас тойже: Владычице, приими.
Молитва
О, священномучениче Николае, веси Култаевския иерею трудолюбнейший, земли Пермския молитвенниче усердный, чад Церкве Русския скорое услышание и всех притекающих к мощем твоим целителю отраднейший! Приими моление наше и пение благодарственное, храм бо тобою созданный и от бури безбожия пречудно сохраненный имамы яко свидетельство огненныя ревности твоея о славе Божией и о спасении душ христианских. Темже молим тя: помози пастырем земли нашея Пермския храмы новы воздвизати, и во имя Господа труды подвижническия совершати, людем же в вере возрастати, и о очищении сердца попечение прилагати; и всем нам, с любовию мощем твоим покланяющимся, подаждь избавление от недугов душевных и телесных, и исполни всякое на пользу духовную прошение, да непреткновенно шествующе путем спасения, достигнем вси Небеснаго Царствия, и тамо с тобою прославим в Троице покланяемаго Бога нашего, Отца и Сына, и Святаго Духа, ныне и присно и во веки веков. Аминь.