Служба священномученикам иерею Павлу (Аношкину) и диакону Григорию (Смирнову), Мокинским (Пермским)

Священномученикам Павлу и Григорию Мокинским

НА ВЕЛИЦЕЙ ВЕЧЕРНИ

На Господи, воззвах: стихиры на 8, глас 4

Подобен: Яко добля:

О, святии мученицы, / христиан украшение / и Пермския земли утверждение, / Павле и Григорие славнии! / К вам припадаем с верою, / житие и страдание ваше воспоминающе, / и помощи благодатныя просяще, / и целующе мощи честныя ваша, // исцеление всем источающия.

Плач умиленный Павел издаде, / со сверстники юными сый на месте святем, / идеже стоясте нозе Твои, Господи, / сострадания с благодарением исполненный, / и Крест облобыза, на немже источися Кровь Владычня, / и светом Воскресения слезы его адаманты соделашася, / прообразующе мученик твердость, / юже яви не по многих летех, // посреде нощи и зимы возсияв благодатию.

Не на земли скрыл еси себе сокровище, / Григорие досточудне, / но в сердце к Богу глаголющем, / псалмы и пеньми и песньми духовными; / сия от юности паче топазия и злата возлюбив, / себе самаго духовно усовершил еси, / и люди общники сего богатства сотворил еси, / еже в любовь Божию скоро возводит, // даже до мученическия славы.

И к конем привязуеми, / и мразом ночным истязаеми, / и сечении мечными люте ураняеми, / храми явистеся Духа Святаго, / страстотерпцы Христовы, / младости своея не пощадившии: / темже яко мужи совершеннии / к Богу возшедше, Того молите // Русь от бури мятежныя избавити.

Ины стихиры, глас 1

Подобен: Всехвальнии мученицы:

Любовию веры связуеми, / Павле с Григорием доблии, / ко спасению многия люди настависте, / образ братолюбия святых показующе, / еже жити братии вкупе, вкупе же и умрети о Христе. / Егоже ныне молите, / да егда приидет испытания час, // веру любовию сохраним.

Сердце стяжавше сокрушенное / подвигом постным противу страстей, / сего ради неуязвлени бысте от врага, / убивающа телеса ваша, / но светлостию душ ваших убиваема, / ко Христу восходящих / в горний Божественный мир, // чистых сердцем пристанище.

Всяк град страны Пермския празднует, / известие приим явления вашего, / заступницы наши и молитвенницы, / священномученицы Павле и Григорие, / не под спудом, но на свещнице возсиявшии в концех днесь, / Христа проповедающе, / Распятием и Воскресением спасшаго мир // за крайнюю благость.

Всехвальнии мученицы, / Павле с Григорием чуднии, / испросите у Бога / Церкви нашей во истине крепкое стояние, / отроком доброе воспитание, исцеление недужным, / душам спасение, / стране же Российстей нашей мир // и велию милость.

Слава, глас 3:

Коль добро и коль красно / самобратное стремление святых мученик, / ихже служение у Престола Божия братия сотвори, / любовь же ко Христу страдати даже до крове укрепи. // Тех молитвами, Господи, в братолюбии утверди нас. 

И ныне, Догматик: Како не дивимся:

Вход. Прокимен дне. И чтения

Деяний святых апостол чтение (глава 4):

Во дни оны, / глаголющим апостолом к людем, / наидоша на них священницы и воевода церковный и саддукеи, / жаляще си, за еже учити им люди и возвещати о Иисусе воскресение мертвых, / и возложиша на них руки и положиша их в соблюдение до утрия, / бе бо вечер уже. / Мнози же от слышавших слово вероваша, / и бысть число мужей яко тысящ пять. /  Бысть же наутрие собратися князем их / и старцем и книжником во Иерусалим, / и Анне архиерею, и Каиафе, и Иоанну, и Александру, / и елицы беша от рода архиерейска. / И, поставльше их посреде, вопрошаху: / коею силою или коим именем сотвористе сие вы? / Тогда Петр, исполнився Духа Свята, рече к ним: / князи людстии и старцы Израилевы, / аще мы днесь истязуеми есмы о благодеянии человека немощна, / о чесом сей спасеся, / разумно буди всем вам и всем людем Израилевым, / яко во имя Иисуса Христа Назореа, / Егоже вы распясте, Егоже Бог воскреси от мертвых, / о Сем сей стоит пред вами здрав. / Сей есть Камень, укоренный от вас, зиждущих, / бывый во главу угла, и несть ни о едином же ином спасения. / Несть бо иного имене под небесем, даннаго в человецех, / о немже подобает спастися нам.

Деяний святых апостол чтение (глава 4):

Во дни оны, / видяще иудеи Петрово дерзновение и Иоанново / и разумевше, яко человека некнижна еста и проста, дивляхуся, / знаху же их, яко со Иисусом беста. / Видяще же исцелевшаго человека с нима стояща, / ничтоже имяху противу рещи. / Повелевше же има вон из сонмища изыти, / стязахуся ко друг другу, глаголюще: / что сотворим человекома сима? / Яко убо нарочитое знамение бысть има, / всем живущим во Иерусалиме яве, / и не можем отврещися, / но да не более прострется в людех, / прещением да запретим има / ктому не глаголати о имени сем ни единому от человек. / И призвавше их, / заповедаша има отнюд не провещавати, / ниже учити о имени Иисусове. / Петр же и Иоанн, отвещавше к ним, реста: / аще праведно есть пред Богом / вас послушати паче, нежели Бога, судите; / не можем бо мы, яже видехом и слышахом, не глаголати. / Они же, призапрещше има, пустиша я, / ничтоже обретше, како мучити их, людей ради, / яко вси прославляху Бога о бывшем, / лет бо бяше множае четыредесяти человек той, / на немже бысть чудо сие исцеления.

Деяний святых апостол чтение (глава 4):

Во дни оны / отпущена бывша апостола, / приидоста к своим и возвестиста, / елика к нима архиереи и старцы реша. / Они же, слышавше, / единодушно воздвигоша глас к Богу и рекоша: / Владыко, Ты, Боже, сотворивый небо и землю, и море, и вся, яже в них, / Иже  усты Давида, отрока твоего рече: / вскую шаташася языцы, / и людие поучишася тщетным? / Предсташа царие земстии, / и князи собрашася вкупе на Господа и на Христа Его. / Собрашася бо воистинну во граде сем на Святаго Отрока Твоего, Иисуса, Егоже помазал еси, / Ирод же и Понтийский Пилат с языки и людьми  Израилевыми / сотворити, елика рука Твоя и совет Твой преднарече быти. / И ныне, Господи, призри на прещения их, / и даждь рабом  Твоим со всяким дерзновением глаголати слово Твое, / внегда руку Твою прострети Ти во исцеления, / и знамением и чудесем бывати именем святым Отрока Твоего Иисуса. / И помолившимся им, подвижеся место, идеже бяху собрани, / и исполнишася вси Духа Свята, / и глаголаху слово Божие со дерзновением.

На литии стихиры, глас 1:

Первострадалец Христов, Стефан боговенчанный виде / небеса отверста, / и Сына Божия одесную стояща невидимаго Отца, / вы же, священнострадальцы честнии / Павле иерею и диаконе Григорие, // с сонмом мученик одесную Господа предстоите, // небесными венцы украшеннии.

Слава, глас 4:

Павле, доброе Кунгура воспитание, / и Григорие, сыне Вятския земли, / в Пермстем крае Христу добре послужившии, / от оружных устрелени бысте, / но просветистеся яко ангели, / и зрите славу Распеншагося нас ради, / велие дерзновение имуще, / яко победителие, / сего ради с мученики первыми и новыми водворившеся, // молите Господа спастися душам нашим.

И ныне: Призри на моления:

На стиховне, глас 6.

Подобен: Тридневен:

Усердия в вере Андроникова наследницы, / Павле и Григорие священнии, / пострадасте до крове, подвигу архипастыря последствующе: / темже Христа молите / сердце верное даровати // всем почитающим страдание ваше.

Стих: Священницы Твои облекутся в правду, // и преподобнии Твои возрадуются.

Не дасте братоубийству благословения, / сего ради со братиею предел Мокинских Пермския страны / убиени бысте без милости, / милость проповедавшии, / и убийцы своя благословившии, // да познают омраченнии свет покаяния.

Стих: Честна  пред Господем // смерть преподобных Его.

Красуйся и радуйся, Пермская земле, / память мученик празднующи, / предстоят бо тии Христу во славе, / о людех твоих молящеся, / воспевающих подвиги их, // и к мощем их святым припадающих с любовию.

Слава, глас 5:

Внуцы бывше изгнанных из рая / за безсловесное стремление, / ови Каиново братоубийство умножиша, / ови лихоиманию Иудину подражаша; / вы же, мученицы доблественнии, / словесы Евангельскими просвещеннии / и молитвою церковною освященнии, / ратование неправое и лютое отринусте, / хитона Руси раздрания не терпяще, /сего ради во едином часе // мученичеством восхитисте Царство Небесное.

И ныне: Храм и Дверь еси:

Тропарь, глас 5:

Честное страдание ваше / за веру святую Православную / к веселию духовному вся люди созывает, / священномученицы Павле и Григорие, / вы бо землю Пермскую кровьми своими освятивше, / любви совершенней научаете, / душу полагати за Христа Бога нашего, // Светом Воскресения мир обновившаго.

НА УТРЕНИ

По 1-м стихословии седален, глас 5

Подобен: Собезначальное Слово:

Священномучениче Павле, согражданине святых, / земли кротких на небесех насельниче, / страданий Христовых сопричастниче / и благодати Его светильниче, / на Голгофу Пермскую возшедый дерзновенно иногда, / ныне мощми проповедаеши жизнь вечную, // славное Христово Воскресение.

Слава, глас 2. Подобен: Велия веры:

Мраз претерпев и биение, / и коньми влачение и ребр прободение, / святый мученик Григорий радовашеся, / от оружных бо устрелен быв, душею в Царство Небесное вознесеся. // Того молитвами, Христе Боже, спаси души наша. 

И ныне, Богородичен:

Верных Споручнице совершения / и грешным Подательнице исправления, / Пречистая Мати Божия Обрадованная, / Пермскую землю иконами Твоими украсившая, / и святых множество в ней воспитавшая, // Твоими ко Христу молитвами спаси души наша.

По 2-м стихословии седален, глас 2

 Подобен: Благоутробия сущи:

Благоутробия Божия сосуди, / посещения благодатнаго часто сподобляемии, / молитвою усердною уготовиша души ко страданию, / в немже живот временный сохранити не искасте, / но потщастеся Небеснаго Царствия достигнути, // жители его святыя други своя стяжавше.

Слава и ныне, Богородичен:

Благоутробия сущи источник, / милости сподоби нас, Богородице, / призри на люди согрешившия, / яви яко присно силу Твою: / на Тя бо уповающе, радуйся, вопием Ти, // якоже иногда Гавриил, безплотных архистратиг.

По полиелеи седален, глас 8

Подобен: Повеленное тайно:

Повеленное во Евангелии приимше в разуме, / в церкви Божией единомышлением хождасте, святии, / учаще глаголом жизни вечныя люди Божия, / и красоту им показующе веры православныя, / юже да сохранит Господь непоколеблему / от всех навет вражиих / в земли Российстей, непрестанно взывающей: // Пресвятая Троице, Боже наш, слава Тебе.

Слава и ныне, Богородичен:

Повеленное тайно приим в разуме, / в крове Иосифове тщанием предста безплотный, / глаголя Неискусобрачней: / приклонивый схождением Небеса, / вмещается неизменно весь в Тя, / Егоже и видя в ложеснах Твоих, приемша рабий зрак, / ужасаюся звати Тебе: // радуйся, Невесто Неневестная.

Величание:

Величаем вас, / священномученицы Павле и Григорие, / землю Пермскую кровьми вашими обагрившии, / и образ любве ко Христу // показавшии.

Псалом избранный:

         Бог нам Прибежище и Сила.

         Господи, воздвигни силу Твою и прииди, во еже спасти ны.

         Глаголах о свидениих Твоих пред цари и не стыдяхся.

         Вси языцы обыдоша мя, и именем Господним противляхся им.

         Тебе ради умерщвляемся весь день, вменихомся, яко овцы заколения.

         Крепость моя и пение мое Господь, и бысть мне во спасение.

Степенна, 1-й антифон 4-го гласа

Прокимен, глас 4: Проидохом сквозе огнь и воду, / и извел еси ны в покой.

Стих: Разжегл ны еси, якоже разжизается сребро.

Всякое дыхание:

Евангелие от Матфея, зачало 36.

По 50-м псалме,

Слава: Молитвами священномучеников:

И ныне: Молитвами Богородицы:

Стихира, глас 6:

Многи скорби праведным бывают по гласу пророческому, /  аще и мала лета жития их, / вы же, священномученицы Павле и Григорие, / младость свою Церкви Матери повинусте, / и сего ради скоро востекосте / в меру возраста Христова; яко премудрии / и дара мученичества сподобльшиися, / вся грады и веси земли Пермския воздвизаете / почитати мощи ваша, нам дивно явленныя, / зане христианы добрыми, память вашу хранящими, / многа лета от поругания соблюдаемы бывше, / ныне в храме благодати лучи нам простирают, / и вся верныя научают, // како подобает жити и умрети за Христа.

Канон, глас 8

Песнь 1

Ирмос: Воду прошед, яко сушу, / и египетскаго зла избежав, / Израильтянин вопияше, // Избавителю и Богу нашему поим.

Припев: Священномученицы Павле и Григорие, молите Бога о нас.

Мучеников свет веру нашу / утверждает лучезарно всегда, / неизреченно умудряя // припадающия к раце их мощей святых.

Павла почтим со страдальцы, / есть бо Пермския земли красота / и слава Мокинския веси, // священну ризу белу соделавый кровьми.

Песненно вси возвеличим / днесь диакона Григория смерть, / к лучшей ходатаицу жизни, // идеже пение сей творит, служа Христу.

Крепость святых Севастийских / вы усвоисте в житии, / о мученицы терпеливцы, // на мразе босыя Христова светлость вас укры.

Слава: Троица, Бог наш прослави / о Христе добре страдавшия вся, / и мы поим Христовы воины, // закланныя ради веры Троическия.

И ныне: Мука Креста пройде душу / Пресвятую, о Марие, Твою, / и милуеши страстотерпцы, // вселяющи души их в радость Сына Твоего.

Песнь 3

Ирмос: Небеснаго круга / Верхотворче, Господи, / и Церкве Зиждителю, / Ты мене утверди в любви Твоей, / желаний Краю, верных Утверждение, // Едине Человеколюбче.

Мучению люту / цвет Земли Российския / предадеся без милости, / но плоды принесе страдания / во имя пострадавшаго Господа о всех, // Благаго Человеколюбца.

Россию и Церковь / возлюбил еси зело, / о Павле священнейший, / темже ны утверди подъяти крест / трудов, молитвы, подвигов неленостных // за веру православную нашу.

Церковными гласы, / отрок сый, Григорие, / воспел еси радостно,  / и от Вятских предел пришел еси / служити Богу в Пермстем крае истинно, // церковным песнем верныя научая.

Никольския паствы / всем овцам явистеся / заботницы вернии, / тех зовуще на муки и смерть / в годину злых гонений веры правыя, // в страдании Руси и Церкви.

Слава: Возшел есть Спаситель / Бог на Древо Крестное, / Пречистою Кровию / грех омыти хотя людей Своих, / и вы, святии Павле и Григорие, // кресту вашему верни бысте.

И ныне: Пречистая Дево, / Русь зело возлюбившая, / и Пермь озарившая / чудным светом честных икон Твоих, / страдати всех за веру укрепляй всегда, // страдальцев Пермских сонм собравши.

Седален, глас 3

Подобен: Божественныя веры:

Православных учений проповедницы, / ревности о храме Божии исполненнии, / служение усердно совершившии, / и страдание достойно восприяти сподобльшиися, / низпослите пение вам с любовию приносящим // молитвами вашими велию милость.

Слава и ныне, Богородичен:

Божественная скиния была еси Слова, / едина Пречистая Мати Дево. / Утешительница в скорбех сущи, / гонимым за Христа всегда помогаеши, / и в жажду водами молитв Твоих Божественных напояеши, // подающи им милость. 

Песнь 4

Ирмос: Услышах, Господи, / смотрения Твоего таинство, / разумех дела Твоя, // и прославих Твое Божество.

Прослави вас Господь, / духовнии бо есте воини, / благодати чистый свет, // Андроника святаго наследницы.

Недуг душевных врач, / наставник же отроком истинный, / отче Павле, был еси, // тем тя Пермская славит земля.

Святый Григорие, / познав яже к нам любовь Божию, / Духом горя в храм притекл еси, // да послужиши тамо усердно.

Молитвы светлыя / Пермских предел поют жители, / укрепившим их отцы // за Христа не страшитися мук.

Слава: Святыя Троицы, / Отца, Сына со Святым Духом днесь / чада в песнех воспоим, // отцы наша, страдальцев хвалу.

И ныне: Всегда припадаем, / Марие Дево, к Твоей милости, / Ты бо Перми щит еси, // новых мученик Пермских крепость.

Песнь 5

Ирмос: Просвети нас повелении Твоими, Господи, / и мышцею Твоею высокою // Твой мир подаждь нам, Человеколюбче.

Благочестия вы почитаем рачители, / Григорие и Павле премудрии, // зане избрасте часть благую.

Святость Иерусалима возлюбив от юности, / Голгофу, Павле, слезами омыл еси, // идеже Креста познася тебе тайна.

Сослужитель, сомолитвенник, собрат смиреннейший / священнику Павлу Григорий диакон явися, // в мучениих же за Христа сострадатель верный.

Со оружии Русь Святую разрушавшим дерзостно / не дасте помощи ратныя, // Христовы ратники хотяще быти.

Слава: Веселящиися прежде на Каме реце Крещению Господню, / в зиме годины горькия люди Пермстии возрыдаша, // кровь людей Христовых видяще яко воду проливаему.

И ныне: При Кресте Твоего Сына всыновися мир Тебе, / о Дево Пресвятая, Пречистая, // пречестных мученик победо и мире.

Песнь 6

Ирмос: Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися, / и молюся яко Иона // от тли, Боже, возведи мя.

Возшедшим на Голгофу Пермскую / сострадание вси согласно явим, / смерть о Господе подъемшим в лето горько, / в неже аду земля приближися, / но прият святых души небо, // ихже Божий облиста свет.

Сердце твое устроил еси, отче Павле, / верно Богови быти, / и смерть претерпел еси добльственне, / егда возсташа на Руси злодеев тьмы: / темже молим тя, славне, // от плена греховнаго  избави нас.

Молитвами боголюбца Григория / благодать нам подаждь, Христе Боже наш, / вере, простоте, любви и кротости / от святых научитися, / да и мы связуеми будем // святым дружества законом.

Коль многое святых терпение! / Побиени мечем, мучими зле, / по земли влачими коньми в лютый мраз / вопияху Богу усерднейше: / соблюди во истине паству, / Христе Боже, и спаси нас.

Слава: Незрима добродетель ваша бысть / затворенным сердцам губителей злых, / но свою явисте светлость ангелом, / от рук мучителевых убиваеми, / нам же всем сияет днесь чудно // славы вашея святый свет.

И ныне: Егда ученицы бежаша вси / от Креста, Иоанна юна кроме, / страхом движими Христа оставивше, / Ты, о Дево, с Ним пребыла еси, / темже молим: в верности Богу, // Богомати, сохрани  нас.

Кондак, глас 3:

Пастырю добрый Павле / и святолепнаго служения рачителю Григорие, / паству вашу словом просветившии, / святыни Церкве Христовы зело возлюбившии, / и веры ради смерть мученическую приявшии, / ныне землю Пермскую благодатию просвещаете, / и святыня ея бываете, / мощми своими безсмертие проповедающе, // и исцеления точаще всем с верою притекающим.

Икос, глас 2:

Восхвалим, людие, двоицу святых страстотерпцев, / духом мужественнаго иерея Павла / и благоговейнейшаго диакона Григория, / иже союзом братския любве связуеми, / за Христа пострадати сподобишася, / в наша же дни мощи своя святыя явившии, / во утешение всем и укрепление, / безсмертие проповедающе и чудеса источающе. / И ныне молятся, предстояще Престолу Святыя Троицы, / о спасении людей земли Пермския, / и о всем отечестве нашем, да в православии утвердится, // и о всех, подвиг новомучеников  верно почитающих.

Песнь 7

Ирмос: От Иудеи дошедше отроцы / в Вавилоне иногда / верою Троическою пламень пещный попраша, поюще: // отцев Боже, благословен еси.

Кто не восплачет отечества страдание, / убиение святых, / храмов разрушение, детей сиротство, попрание веры! // Но помилуй Русь, Христе Боже наш.

Чада своя безбожие влечет / на распутия греха, / ты же, о Павле, сам предстал еси пред мучители твердо, / Христа Бога стези являя им.

Святый Григорие, Христа моли о всех, / подвиг чтущих крестный твой, / быти им верным чадом Церкве Русския даже до смерти, // яко образ себе нам дал еси.

Упокоения место свято есть / доблих мученик честных, / яко священия источник верным и подвигов память, / иже в святости утверждают Русь.

Слава: Да приведутся Христу старцы и младенцы, / мужи и жены, ныне услышавшии / подвигов ваших весть, в концы исходящую Перми, // и вси вернии да возрадуются. 

И ныне: Сына Воскресшаго зрети чающи, / яко мироносицы жены, / Мати Дево, ко Гробу притекла еси зело рано заутра, // учащи утреневати к Богу нас.

Песнь 8

Ирмос: Царя Небеснаго, / Егоже поют вои ангельстии, // хвалите и превозносите во вся веки.

С пределы Пермскими / ликуют сыны веси Мокинския, // обретению в ней мощей отцев священных.

Тебе молящеся, / согласно поим, да приимем в сердцах // твою любовь, священномучениче Павле.

Святый Григорие, / храни от соблазн люди Мокинския, // и Пермския земли предстатель буди.

Слава: Един от Троицы, / Христос на Кресте нас усвои Себе, // по сих же мученики яви любве во образ.

И ныне: Днесь людие Пермстии / святых обстоят раку, верующе // спастися их и Богородицы мольбами.

Песнь 9

Ирмос: Воистинну Богородицу / Тя исповедуем, / спасеннии Тобою,  Дево Чистая, // с безплотными лики Тя величающе.

Земля издаде сокровище, / мощи священныя / Григория и Павла, Перми воинов, // от всякаго вреда ю защищающих.

О, Павле, священства красото, / верных предстателю, / проси нам стяжати в сердце мир Христов, // на подвиг души наша воздвигнув.

Григорие, добрый воине / Господа нашего, / от глада и меча избави верныя, // святый сострадатель нам и предстатель буди.

О, светочи новых мученик, / Пермских предел хвало, / целующия мощи ваша верою, // наставите сердце чисто стяжати нас.

Слава: Единства союз во истине / Троица нам яви, / да любим вси друг друга, зряще таинство // любве, на Кресте за ны распростершияся.

И ныне: Рабы Твоя сохрани от бед, / Дево Пречистая, / молитвы бо Тебе приносят ангели // и мученик лики днесь, и святии вси.

Светилен:

Светлая риза Духа, / светлый венец Солнца Правды / ваше достояние вечное суть, / святии страстотерпцы, / вами и день сей просвещается // память чтущим вашу святую.

Слава, и ныне:

Света Мати Пречистая, / светом Твоим мир одожди нам, / да радости свет обетованный / прощение возсияет, / молят бо Тя присно за ны // новии мученицы земли Пермския.    

На Хвалитех, глас 8

Подобен: О, преславнаго чудесе:

О, всехвальнии мученицы, / Пермския страны похвало, / в годину брани лютейшия / в Руси обезглавленней пострадавшии, / иерею Павле, смирением великий, / и диаконе Григорие, бодрствующий духом, / в молитвах теплых испросите / раку мощей ваших обстоящим // мир и утешение от Господа.

Не токмо мученик раны телесныя, / но и власи священнии / изочтени суть у Бога, / хранящаго вся кости их, / и души их в руце Своей полагающаго, / и молитву их послушающаго о роде нашем: / темже, святии Павле и Григорие, / помозите и нам присным Богу быти, // трудом покаянным сердце очистившим.

Пения погребальнаго / не лишистеся, блаженнии, / яко многим творящии неленостно / напутие в жизнь вечную, / но яко и святых служителие усерднии, / память их в церкви добре совершающии, / ныне нами воспеваеми в песнех, / подвиг ваш поведающих, // песнословцем вашим милость испросите.

Чадом кротость и послушание, / мужам и женам благочестие, / иноком ревность о Бозе, / святителем укрепление, / богохранимей стране нашей благоверие, / и Церкви Русской во истине стояние / испросите у Господа, / священномученицы Павле и Григорие, // Пермския земли украшение.

Слава, глас 2:

Пророчески убо вопияше Давид во псалмех: / проидохом сквозе огнь и воду, / и извел еси ны в покой; / и вы, священномученицы Павле и Григорие, / огнь ненависти мучительския невредно проидосте, / и воду слез о супружницах и чадех, / о роде и друзех и о пастве своей в души удержасте, / да в вино любве Божия претворится, / и с чашею страдания вашего срастворится: // темже ныне от всех прославляетеся.

И ныне, глас тойже:

Богородице, Ты еси лоза истинная, / возрастившая нам плод живота, / Тебе молимся: / молися, Владычице, / со святыми новомученики и исповедники, во отечестве просиявшими, // помиловатися душам нашим.

Славословие великое. И отпуст.

На Литургии

Блаженна, от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28—39). Аллилуия, глас 2: Священницы Твои облекутся в правду,/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106 (21, 12—19). Конец: В терпении вашем стяжите души ваша. Причастен: Радуйтеся, праведнии, о Господе, правым подобает похвала.

Молитва

О, святии славнии священномученицы, иерею Павле и диаконе Григорие! Днесь верно сошедшеся, восхваляем честное страдание ваше, еже в годину тяжкую гонений на Церковь Русскую претерпесте. Почитаем и самобратную любовь вашу, веры бо нравом связуеми яко единодушнии сослужителие, согласно и муки за Христа приясте. Ублажаем юже к слову Божию любовь вашу, псалмопевца бо глаголы в час испытания воспомянусте, яко добро и красно жити братии вкупе, благо же есть и в Царствии Небеснем вкупе веселитися. Дивимся долготерпению вашему, ни мраз бо, ни раны, ни коньми истязание от Бога вас разлучиша. Покланяемся честным мощем вашим, долголетно под спудом земным сокровенным, напоследок же, яко некий дар светоносный, всей земли Пермстей возсиявшим.  Ныне молите великодаровитаго Бога, явлением мощей ваших нас недостойных почтившаго, да пробавит молитвами вашими и всех новомученик Пермских милость Свою ведущим веру православную, да обратит к ней отпадшия, да укрепит верных доброму образу стояния вашего за правду Божию последовати, да сподобит нас от мощей ваших почерпнути исцелений Божественное действо, благодать и милость, и да дарует нам едиными усты и единем сердцем исповедати Отца и Сына и Святаго Духа  до скончания века. Аминь.