Акафист священномученикам иерею Павлу (Аношкину) и диакону Григорию (Смирнову), Мокинским (Пермским)

Кондак 1

Возбранных воинов Христовых терпение и мужество, / и добродетелей их соцветие победное / воспоим днесь любовию, мучениколюбцы, / исцелений душам и телесем просяще, / и пред мощми новопрославленных угодников Божиих с верою взывающе: // Радуйтеся, священномученицы Павле и Григорие, Пермския земли благодатнии заступницы.

Икос 1

А+нгелов и небесных человеков собору приобщившияся ныне восхвалим, / священника Павла и диакона Григория мучеников, земли Пермския доброту, / и житие их венцем правды увенчанное воспоминающе, возопиим сице:

Радуйтеся, в Православной России рожденнии,

Радуйтеся, в Христовой Церкви воспитаннии.

Радуйтеся, издетска приметавшиися храму Божию,

Радуйтеся, от юности прилежавшии премудрости Господней.

Радуйтеся, Павле, в псалмопении усердствовавый, и Григорие, в гимнах церковных поучавыйся.

Радуйтеся, великим таинствам внимавшии и к небесем благодатными глаголы восперявшиися.

Радуйтеся, проходившии многая богоугодная поприща,

Радуйтеся, поспешавшии к коемуждо требующему помощи.

Радуйтеся, Пастыря добраго избранницы,

Радуйтеся, Сеятеля истины наследницы.

Радуйтеся, Лозы небесныя рождие плодоноснии,

Радуйтеся, Источника безсмертнаго общницы достойнии.

Радуйтеся, священномученицы Павле и Григорие, Пермския земли благодатнии заступницы.

Кондак 2

Видяще святии на жатве Христове делатели усердно труждающияся, / возревноваша сим последовати, и Господу поработати на ниве Его, / слово учения Евангельскаго сеюще, и хваляще Бога: Аллилуия.

Икос 2

Разум незаблудный в подвизе молитвенном стяжавше, многим бысте  ко Христу путеводители и во благочестии наставницы, / учаще Таинства Церкве крепце любити, и слову Божию внимати, / егоже изъясняли есте людем, благодарящим вас сице:

Радуйтеся, Евангелием умы умудрившии,

Радуйтеся, молитвами души озарившии.

Радуйтеся, учители людей своих благодатнии,

Радуйтеся, ревнители преданий отеческих духоноснии.

Радуйтеся, Павле, Кунгура воспитание и Григорие, Вятския земли порождение,

Радуйтеся, недуг душевных врачевание и пастве Христовых овец утешение.

Радуйтеся, сомолитвенницы светлии, прихожан храма Никольскаго воспитатели,

Радуйтеся, служители вернии, пути отцев святых последователи.

Радуйтеся, священнодействователей честная похвало,

Радуйтеся, миряном благое поможение.

Радуйтеся, якоже бо сами заповеди твористе, тако и люди научали есте.

Радуйтеся, сего ради велицы в Царствии Небеснем нареклися есте.

Радуйтеся, священномученицы Павле и Григорие, Пермския земли благодатнии заступницы.

Кондак 3

Сила Вышняго осени вас, восходящих на степени священства церковнаго, / темже дар служения у престола Божия достойно приимше, / священными усты и очищенным сердцем воспевасте: Аллилуия.

Икос 3

Имуще благоприятное время делания, Богу усердно служили есте, / паству вашу от волков мысленных охраняюще, / к добродетелем же юныя наставляюще, от всех благодарно восхваляемии сице:

Радуйтеся, светильницы благодати Христовы,

Радуйтеся, сосуди благоутробия Божия.

Радуйтеся, яко мужественнии духом,

Радуйтеся, яко бодрствующии сердцем.

Радуйтеся, Павле, иереев красото, и Григорие, диаконов светлосте,

Радуйтеся, святолепныя службы рачители и святых почитатели.

Радуйтеся, служением у престола Божия просветившиися, яко ангели,

Радуйтеся, подвигом во броня веры оболкшиися, яко апостоли.

Радуйтеся, дружества законом связуемии,

Радуйтеся, братолюбия союзом почтеннии.

Радуйтеся, Таин Святых Христовых смиреннии служители,

Радуйтеся, таинств семи церковных истовии сопричастницы.

Радуйтеся, священномученицы Павле и Григорие, Пермския земли благодатнии заступницы.

Кондак 4

Бурю внутрь имуще помышлений лютых противу Церкве и Царя православнаго, воем германским противоборствующа, / мнози людие российстии мятежу, врагами учиненному, соединишася; / егда же вы, святии Павле и Григорие, возведение в сию годину тяжкую святителя Тихона на престол патриарший уведесте, с надеждею воззвасте Богу: Аллилуия.

Икос 4

Слышавше словеса огненная архипастыря Андроника, суду Божию гонителей веры предающаго, / призвасте, отцы наши Павле и Григорие, люди мокинския на защищение Церкве и России Великия, на молитву усердную, на крестохождение небоязненное в защиту святынь православных, / и не по мнозех днех за печальником земли Пермския на муки и смерть последовасте; темже воспеваем вас сице:

Радуйтеся, в годину лютую от слуха зла не убоявшиися,

Радуйтеся, чада Божия на подвиг веры уготовившии.

Радуйтеся, в борьбе со грехом явившиися мужие совершеннии,

Радуйтеся, на брань с диаволом изшедшии воини духовнии.

Радуйтеся, пламенныя веры Андроника, святителя Пермскаго наследницы,

Радуйтеся, огненныя ревности того о славе Божии подражатели.

Радуйтеся, люди веси Мокинския во благочестии утвердившии,

Радуйтеся, прихожаны церкве Никольския на страдание укрепившии.

Радуйтеся, яко храмы Духа Святаго себе соделасте,

Радуйтеся, яко сострадальцы Страстем Христовым быти возжеласте.

Радуйтеся, судьбу России мучимыя разделившии,

Радуйтеся, воскресение Христа Распятаго благовестившии.

Радуйтеся, священномученицы Павле и Григорие, Пермския земли благодатнии заступницы.

Кондак 5

Боготечную звезду всем верным Своим посла Господь в годину страданий, Крест Свой, / и Той яко светильник путь им озарил есть на гору высоку мученичества. / Вы же, святии Павле и Григорие, тамо восходяще, воспевасте: Аллилуия.

Икос 5

Видевше отроцы Вавилонстии пещь огненную мучения, / за законы отеческия в ню ввергошася, ангелы прохлаждаеми; / вы же, святии Павле и Григорие, во огнь страдания входяще, слышасте от ангел сицевая:

Радуйтеся, на муки лютыя подвигом души уготовившии,

Радуйтеся, на Голгофу Пермскую десницею Божиею возведеннии.

Радуйтеся, святыни храма прежде мук облобызавшии,

Радуйтеся, молитвы веры посреде страданий вознесшии.

Радуйтеся, мраз лютый претерпевшии, яко сорок мучеников Севастийских,

Радуйтеся, коньми влачение приимшии, яко Феодор, страдалец Пергийский.

Радуйтеся, железным остном прободеннии, яко Прокл, рождение Калиптское,

Радуйтеся, многими ранами уязвленнии, яко Севастиан, похвала Медиоланская.

Радуйтеся, уничижений и поношений за Христа сподобльшиися, яко Трифон, в Никеи убиенный.

Радуйтеся, мечному усечению во главу подвергшиися, яко Пантелеимон, целебник всемирный.

Радуйтеся, яко огнь ненависти мучительския невредно претерпесте,

Радуйтеся, яко росу благодати мученическия радостно приясте.

Радуйтеся, священномученицы Павле и Григорие, Пермския земли благодатнии заступницы.

Кондак 6

Проповедницы богоноснии мученицы явишася, кровь за веру излиявше, / с нимиже и вы, о Павле и Григорие, небеса наследовасте, многия муки претерпевше, / темже дерзновение ко Христу стяжасте всем верным помогати, поющим Богу: Аллилуия.

Икос 6

Возсиявше на тверди небесней, яко звезды, отгоняете безбожия мрак, / и к сонму новомученик причтеннии, ходатайствуете о умножении веры в земли нашей; / темже и мы, ко святым мощем вашим притекающии, вопием сице:

Радуйтеся, Пермския страны утверждение,

Радуйтеся, новых мучеников украшение.

Радуйтеся, терпеливцы Божественнии,

Радуйтеся, страстотерпцы Христовы.

Радуйтеся, Павле, немощных покровителю, и Григорие, обидимых утешение,

Радуйтеся, столпи подвизающихся во истине и наставницы ищущих просвещения.

Радуйтеся, яко в роды родов пребывает ваша память,

Радуйтеся, яко во веки веков прославляет вас Церковь.

Радуйтеся, всехвальнии мученицы,

Радуйтеся, честнии священнострадальцы.

Радуйтеся, дерзновеннии молитвенницы ко Отцу Небесному,

Радуйтеся, непостыднии ходатаи за Русь Православную.

Радуйтеся, священномученицы Павле и Григорие, Пермския земли благодатнии заступницы.

Кондак 7

Хотящия погребсти у алтаря храма Никольскаго честная телеса ваша и пение надгробное сотворити / Мати Божия омофором Своим от убийц и кощунник сохранила есть, / имена же погребающих в книзе животней написашася, со слезами поющих: Аллилуия.

Икос 7

Новое показа чудо в Троице славимый Господь, сохранив святыя мощи ваша в веси Мокинстей долголетно в земли невреждены, / аще и храм честный поруганию предадеся, и в разрушение прииде; / темже вернии, на место упокоения вашего притекающе, взываху сице:

Радуйтеся, в подвизе вашем путь спасения людем указавшии,

Радуйтеся, в погребении вашем на подвиг крестный паству вдохновившии.

Радуйтеся, яко в лихолетии сподобистеся надгробнаго пения,

Радуйтеся, яко ныне Богу приносите наше моление.

Радуйтеся, Павле, царствуяй со апостолы, и Григорие, веселяйся с мученики,

Радуйтеся, воспитавшии истины поборники и добродетелей небесных венечники.

Радуйтеся, верных скорбь о убиении вашем в радость претворившии,

Радуйтеся, добрую весть о подвизе вашем в Церкви явившии.

Радуйтеся, веры ради смерть мученическую приимшии,

Радуйтеся, мученичества ради жизнь вечную обретшии.

Радуйтеся, светом воскресения души ваша украсившии,

Радуйтеся, елеем радования светильники ваша исполнившии.

Радуйтеся, священномученицы Павле и Григорие, Пермския земли благодатнии заступницы.

Кондак 8

Странное чудо видевше, устранимся суеты мирския, и удивимся уведевше живу мученик память во обретении мощей их, / ихже место погребения жители веси Мокинския оградиша, / и всякому приходящу кланятися повелеваху, в сердце воспевая: Аллилуия.

Икос 8

Вси во огни любве Божественныя, иерею Павле с единомудренным собратом диаконом Григорием, / на небеси престолу Божию предстали есте во единем лице с новомученики славными, / сего ради от всех воспеваетеся сице:

Радуйтеся, яко память ваша на земли с похвалами,

Радуйтеся, яко радость ваша на небесех со святыми.

Радуйтеся, престолу Божию во свете предстоящии,

Радуйтеся, Матерь Божию во очию видящии.

Радуйтеся, Павле, молитвенниче крепкий, и Григорие, помощниче скорый,

Радуйтеся, дерзновение стяжавшии мученическое и молитве навыкшии непрестанней.

Радуйтеся, печальницы наши и ходатаи,

Радуйтеся, сострадатели наши и защитницы.

Радуйтеся, самовидцем жития вашего столпи светоноснии,

Радуйтеся, новообращенным в веру православную кормчии добрии.

Радуйтеся, не ведущим бо вас внезапу яко попечители открываетеся,

Радуйтеся, от возлюбивших вас ныне яко благодетели ублажаетеся.

Радуйтеся, священномученицы Павле и Григорие, Пермския земли благодатнии заступницы.

Кондак 9

Всякое естество ангельское во единении со святыми древними и новыми Бога прославляет, / мучениколюбцы же воздвизает усердно угодников Божиих почитати, мощем же тех верно покланятися, / да вси, светом благодати просвещаеми, поют: Аллилуия.

Икос  9

Ветии духовнии воспевают радостно честное обретение мощей ваших, / не точию бо Пермстей земли сие вменися в милость, но и всякому граду и стране, идеже чтут новомученик память; / темже и мы с почитатели вашими, о Павле и Григорие, лик составльше, согласно воззовем:

Радуйтеся, весь Мокинскую телесы многострадальными облагодатившии,

Радуйтеся, людем вашим, прошения возсылающим, чудодействовавшии.

Радуйтеся, под спудом до времене суще, в мире живущих помощию не оставльшии,

Радуйтеся, в явление послежде пришедше, мира страждущаго скорби утоляющии.

Радуйтеся, о людех православных попечители и скорбящим в бедах утешители,

Радуйтеся, церковных чад воспитатели и заблуждающихся к свету путеводители.

Радуйтеся, помощницы юным во избрании нивы церковныя,

Радуйтеся, наставницы верным в трудех во славу Божию.

Радуйтеся, служителем престола Божия к совершенству путь показующии,

Радуйтеся, молитвенником в земли Пермстей к постоянству силу подающии.

Радуйтеся, подвизающимся во храмех святых поможение доброе,

Радуйтеся, изнемогающим в печалех лютых подпора крепкая.

Радуйтеся, священномученицы Павле и Григорие, Пермския земли благодатнии заступницы.

Кондак 10

Спасти хотя мир, Господь наш и Владыка Церковь учреди со Святыми Таинствы ея, / святыни же дарова роду человеческому, чудотворя и в телесех усопших угодников Своих; / мы же обретению мощей священномучеников Павла и Григория радующеся, вопием: Аллилуия.

Икос  10

Стена еси девам, Богородице, аще и телесе святаго земным не оставила еси, точию ризу и пояс на утешение наше, / обаче по земли доныне ходиши, певаема небесными гласы, в помощь вземши угодников Сына Твоего, / иже во гробех лежаще духи прогоняют, болезни же исцеляют; с нимиже святии Павел и Григорий, нетлением мощей и риз священных прославльшиися, воспеваются от всех сице:

Радуйтеся, сокровище в земли крыемое нам даровавшии,

Радуйтеся, благословение на небесех раздаемое сим источившии.

Радуйтеся, яко обретению гробов ваших удивися мучениколюбцев сословие,

Радуйтеся, яко явлению мощей ваших возрадовашася небесная воинства.

Радуйтеся, веси Мокинския благовестницы и тоя благоухание,

Радуйтеся, от ангелов воспеваемии и от человек похваляемии.

Радуйтеся, Пермских святых празднество явлением благодатным вашим украсившии,

Радуйтеся, Спасителя Вознесшагося храм пренесением святых мощей ваших возвеселившии.

Радуйтеся, Троицы поборницы, в Перми Велицей водворившиися,

Радуйтеся, Духа жилища, в людех благоговейных чудодействовавшии.

Радуйтеся, празднество ново людем своим даровавшии,

Радуйтеся, святынею новою в краи нашем возсиявшии.

Радуйтеся, священномученицы Павле и Григорие, Пермския земли благодатнии заступницы.

Кондак 11

Пение молебное совершается на всяк день усердно во храме Вознесения Господня, / в немже положены суть цельбоносныя мощи ваша, священномученицы Павле и Григорие, / верным на утешение, единогласно хвалящим Бога: Аллилуия.

Икос 11

Светоподательный светильник рака мощей ваших явися граду Перми и всей земли нашей, / мученик бо своих почтити достойно малии и велицыи притекают, / и утешение с просвещением вкупе приемлюще, возглашают сице:

Радуйтеся, благодатию не под спудом, но на свещнице сияющии,

Радуйтеся, телесы не под землею, но во храме пребывающии.

Радуйтеся, душ скорбящих животворное обновление,

Радуйтеся, недугов тяжких надежное исцеление.

Радуйтеся, Павле, святых согражданине, и Григорие, друже спасенных,

Радуйтеся, людей Пермских святыня и всех верных веселие.

Радуйтеся, яко никтоже лишается милостивнаго вашего посещения,

Радуйтеся, яко николиже пресецается милосердия вашего источник.

Радуйтеся, мощми вашими безсмертие проповедающии,

Радуйтеся, от раки вашея чудеса источающии.

Радуйтеся, питатели наши и молитвенницы,

Радуйтеся, благодетели наши и защитницы.

Радуйтеся, священномученицы Павле и Григорие, Пермския земли благодатнии заступницы.

Кондак 12

Благодать прияти восхотевше людие Пермстии, / со тщанием к вам притекают на всяк день, многих знамений и чудес сподобляющеся, / и другов и ближних своих созывающе пети: Аллилуия.

Икос 12

Поюще обретение мощей ваших, восхваляем вас, яко Божиих угодников, / вами бо неверующии ко Христу приводятся, болящии приемлют здравие, грешницы обращаются ко благочестию, / и вси благодарственно взывают сице:

Радуйтеся, покаяния спасительнаго проповедницы,

Радуйтеся, сострадания Спасителева провозвестницы.

Радуйтеся, прощения на Кресте грехов наших возвестители,

Радуйтеся, избавления в Таинствах от недугов наших указатели.

Радуйтеся, Павле, верных поборниче, и Григорие, вразумление падшим,

Радуйтеся, края Пермскаго чудотворцы и светильницы душам нашим.

Радуйтеся, младенцем и отроком наставницы неленостнии,

Радуйтеся, отцем и матерем помощницы благопоспешнии.

Радуйтеся, монахом и священником покровители усерднии,

Радуйтеся, старым и недужным утешители истиннии.

Радуйтеся, украшение новых мучеников,

Радуйтеся, радование всех мучениколюбцев.

Радуйтеся, священномученицы Павле и Григорие, Пермския земли благодатнии заступницы.

Кондак 13

О, святии сродницы наши, / священномученицы Павле и Григорие, / за веру Христову во дни гонений пострадавшии, / и мощми своими нам ныне возсиявшии! / Моление наше малое приемлюще, / всем полезное подайте еже ко спасению, / и в Царствие Небесное восход испросите / любовию чтущим вас и поющим Богу: / Аллилуия, аллиулия, // аллилуия.