На велицей вечерни
На Господи воззвах, стихиры, глас 1.
Подобен: Всехвальнии мученицы:
Церкве Русския светлое торжество приспе / в прославлении обретеннаго сокровища, / честныя бо мощи священномученика Константина, / многолетно сокровеннии в веси нашей во имя преподобнаго Сергия, / ныне явишася, лучи благодати испущающе / во вся концы многострадальныя Пермския земли, / во славу Христа, подающаго душам нашим мир // и велию милость.
Житие твое, отче Константине, нескверное, / Христос венча страданием за имя Его, / егда в темнице тя на подвиг уготовляше, / со множеством верных муки прияти, / темже припадаем ти, / молитвами твоими, / ниспосли душам нашим мир // и велию милость.
Светлое ведение благодати / в души очищенней вместил еси / словесы Божии люди просвещая, / от избытка сердца устом твоим глаголющим, / радостию и ныне нас в скорбех утеши, / тебе бо молимся, отче Константине, / даровати душам нашим мир // и велию милость.
Ины стихиры, глас 6:
Святителя честнаго Адроника послушницы, / в день мученичества его свыше призваннии / ко страданию во имя Христа, / иерею Константине со Ананиею единомысленным, / от веси Сергинския со чады духовными отгнани бысте, / и во граде Перми в темнице заключаеми, / претерпесте глад и лишения, / судом же скорым и нарочитым осужденнии, / и горьким тщанием зверонравных убиеннии, / вселился еси в небесныя обители, / идеже глас архипастыря священномученика услышасте: // приидите, Царствия наследницы, Богом благословеннии.
Под сению Креста Животворящаго / во служении иерейстем благочестно пожившии / во дни Пасхи преполовившейся, / блаженное же и страдальческое скончавше к мученичеству приуготовление, / в поминовения день ко отцем приложистеся, / кровей честных излиянием, / о пастырие наши Константине и Анание со чады духовными, / молите о нас ко Господу, / не мудрствовати земная, но взыскати небесная, // и благодати пасхальныя подвига вашего достойными быти.
Пермския земли украшение / мощи твоя цельбоносныя быша, / священномучениче Константине, / многими бо раны тяжкими и убиением ко страдальцем Христовым сопричтен еси, / и сего ради велие дерзновение стяжав, / молишися о чтущих память твою, / подати нам недугов исцеление, / и в скорбех утешение, // и руководство душ наших к жизни вечней.
Слава, глас 2:
Крестом священства украшенный, / сей яко святыню нам даровал еси, / священномучениче Константине, / Евангельских словес проповедниче, / со иереем Ананиею и чады духовными / молитвенник за ны явился еси неусыпный, / и чудотворец милостивый и скоропослушливый, / всем прибегающим к раце мощей твоих / радость Пасхи Христовы вечныя возвещаяй, // юже испроси нам, память твою почитающим.
И ныне: Кто тебе не ублажит.
Вход. Прокимен дне.
И чтения новомучеников – 3.
На литии, стихиры, глас 2:
Русь Святую сердцем обнимая, / в дальних весех тоя Богу послужил еси, / священномучениче доблий Константине, / святым русским в смирении и мужестве подражая, / в годину гонения тяжкого даже до крове пострадал еси, / темже память твою радостно празднуем / и мощем твоим покланяемся, славяще Господа, / сокровище неотъемлемо нам даровавшаго: // любовь твою и молитву о нас непрестанную.
Глас 4
Словеса Евангельские верным возвещал еси, / заблудших на путь правый наставляя, / священномучениче Константине, / врачу душ изрядный и проповедниче неутомимый, / воине Христов, рачителю усердный, / за очищение сердец, тебе открывающихся тепле, / темже и нам повеждь слово Христово, // да прославим дивнаго во святых Бога нашего.
Слава, глас 3:
Благодатию Святаго Духа, / благоволением Отчим пострадал еси за Сына Божия, / священномучениче Константине, / Серги, веси Сылвинския оплоте духовный, / и земли Пермския украшение, / о всех нас, мощем твоим припадающих, молися, // спастися верою Христовою душам нашим.
И ныне, глас той же:
Без се́мене от Боже́ственнаго Ду́ха, / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́, / и Младе́нца млеко́м пита́ла еси́. / Те́мже не преста́й моли́ти, / изба́витися от бед душа́м на́шим.
На стиховне, стихиры, глас 8, подобен: «О преславнаго чудесе»
Божественныя ревности исполнен, / отче мудре Константине, / послушник верен явился еси, / архипастырю Андронику, верою пламенеющу, / и тому в защищении святыни церковныя последовал еси, / темже страдания венцем украшаемь, / званый в Царствие Небесное, / награды избранных сподобился еси – // одесную Христа с новомученики предстояния.
Пострадал еси крепчайше за веру истинную / в вертограде учения духовнаго, / безбожными руками превращагося, / во адово место казней лютых, / и тамо муки от ран многих и убиение приял еси / с сострадальцы твоими, отче Константине, / темже в раи сладости процвел еси, / яко древо, сению от зноя страстей укрывающее, // корень имущее напоен благодатию.
Веселится Церковь Русская, / новомученик своих возвеличивши, / о обретении честных священных мощей, / пастыря веси Сергинской / иерея Константина прехвальнаго, / теплаго нам заступника, / и всем людем Пермским светильника, / лика страдальцев Христовых сопричастника, // и молитвенника о чтущих память его.
Слава, глас 5:
В болезнех мук многодневно томимь, отче, с сотрадальцы твоими / вся претерпел еси Безсмертнаго ради Владыки, / темже вместо телесных страданий во узилище, / в брачныя ризы Агнцем Божиим страстотерпцы облечени быша, / за скорби слезныя улучиша венцы, / за смирение крестное рай: / и за неправедное осуждение, в Небеснем Царствии житие,// молитвами священномученика Константина, Боже, спаси души наша.
И ныне, глас тойже:
Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим..
Тропарь, глас 1
Священник Церкве Христовы и мученик достославный / и земли Пермския украшение явился еси, отче Константине / с сослужителем твоим иереем Ананиею и чады духовными / в годину смуты безбожныя за веру пострадавый, / и мощи твоя священныя нам чудесно явивый / верно воспевающим тя // и просящим душам нашим велия милости.
На утрени
По первом стихословии
Седален, глас 4, подобен: Явился еси днесь вселенней.
Обрадовал еси Землю Пермскую / явлейся, отче Константине, мощми твоими всем нам, / похвалы поющим тебе, / пострадал бо еси и благодатию возсиял еси, // мучениче досточудне.
Слава и ныне, глас и подобен тойже:
Освятила еси верных сердца / светлостию взора Твоего, о Богомати, тихо просиявши нам, / в песнопениях зовущим Ти: / Распинаема волею Сына Твоего видевши, о нас Того умоляй, // Дево Всенепорочная.
По втором стихословии
Седален, глас 5, подобен: Собезначальное Слово.
Усерднаго служителя Богу и людем, / похвалу многострадальныя Церкве нашея / прославим, вернии, и возвеличим, / яко подвизавшагося в вере воспитати паству свою, / и многия муки достойно претерпети, / и предстати чистым и верным Христу, // просиявая доблим страданием своим.
Слава и ныне, глас и подобен тойже:
Всенепорочную радость Творцу и Избавителю, / Деву, рождшую Спаса нашего, / возблагодарим днесь, людие Пермстии, и прославим,/ яко яви постоянство жития высочайшаго, / и милосердие матернее, / и помощь сострадательнейшую, подкрепляему новомученик молитвами, // в земли нашей просиявших страданием своим.
По полиелеи
Седален, глас 1, подобен: Пустынный житель:
Образ священства и добродетели правило, / и заступник нам явился еси, Константине отче наш, / многими подвиги и страдании дар чудотворения стяжав, / исцеляеши телесныя болезни и язвы душ притекающих к тебе. / Слава Укрепившему твое мужество на страдание, / слава благодатию мученичества Освятившему тя, // слава Подающему от мощей твоих верным исцеления.
Слава и ныне, глас и подобен тойже:
Избранная от родов и Превышшая Ангел, / во всех концех земли просияла еси, Усердная Заступнице наша, / добрым разумом, подвигом и любовию величайшую почесть приимши, / Мати Божия сподобилася еси быти и спасения нашего Ходатаица, / Слава Тобою святители Умудрившему, / слава Тобою Укрепившему мученик и преподобных отцев, // слава Тобою новомучеником Российским утешение Подавшему.
По 50-м псалме, стихира, глас 6:
Крест воздвизаемь ежелетно празднующе, / в служении священнем пребывали есте царственно, / отче Константине славне со иереем Ананиею верным, / во храме, подобящемся светильнику на длани девы мудрыя./ Но в годину темную страшную / сами светильницы явилися есте Церкве Русския, / многи бо раны претерпевше, / и убиение от рук безбожных приемше, / во Сретение Христу душами возлетели есте / телеса оставивше на земли яко святыню, / Того молите о нас, да горняя мудрствуем, // житие и подвиг ваш благодарно почитающе.
Канон, глас 8
Песнь 1
Поим Господеви, / проведшему люди Своя сквозе Чермное море, // яко Един славно прославися.
Воспоим священномученика Константина, / возсиявшаго мощми своими в Пермстей земли, // Господа Воскресшаго добре прославляя.
Благоухание добродетелей, / венечника Христова, новых мучеников украшение, // иерея Константина прославим.
Сокровище под спудом земли / многолетно сокровенное, // мощи единаго от мученик Пермских явишася преславно.
Богородичен: Погребение Сына видевши, / Пречистая Дева сердцем болезноваше с плачем, // но в радость Воскресения вшедши, с Ним прославися.
Песнь 3
Страх Твой, Господи, всади в сердца раб Твоих, / и буди нам утверждение, // Тя во истине призывающим.
Зерно веры в сердце твое приемый, / класы добродетелей и подвигов возрастил еси, священномучениче, // Бога непрестанно призывая.
Отеческое наследие, жребий Перми Великия, / край свой прекрасный прославил еси, // любовь Христову в сердце стяжав.
Труды неустаннии и скорбей многих терпение, / горесть же лишения супружницы добрыя // не заградиша уста Твоя благодарно Богу взывати.
Богородичен: Священников доброе воспитание, / мученики дерзновением обогатившая, // Мати Дево, сокровище любве и милосердия.
Седален, глас 5
Горе сердце возводил еси во олтаре Господни, / величая Творца всяческих, / пение же красное воспевал еси во служении пресветле / Отцу, и Сыну, и Духу Пресвятому, / темже душевное благоустроение обрет, / Христа ради на муки и смерть уготовился еси, / молися прилежно о нас, отче Константине, // да ревность стяжим во еже Богу угождати.
Слава и ныне:
Образы Твоя украшают пределы Уральския, / обновляют же грады и веси земли Пермския, / о Тебе, Пречистей Богородице и Всех Царице веселящияся, / Ты бо Источник чудес и Стена необоримая, / сопротивных ополчения низлагати смиренным всегда помогавшая, / и мир Отечеству нашему, веру хранящему, в бедах испрошавшая, // и ныне настави люди земли нашея в мире и покаянии Богу угождати.
Песнь 4
Услышах, Господи, / смотрения Твоего таинство, / разумех дела Твоя, // и прославих Твое Божество.
Евангелия Христова / проповедник явился еси людем, / вразумляя чада духовная // разумно славити Троическое Едино Божество.
Заповеди Господни / во еже чтити любовию Бога / и образ Его в коемждо человеце ища обретати // исполнил еси, воспевая Христа Воскресшаго Божество.
Восперив ум ко Господу, / не прилеплятися земному учил еси люди, / да разумеют писания и узрят чудеса многи, // яже являют Христово Божество.
Богородичен: Неотмирная святыня Пресветлая, / Мати Божия, Благословенная, / священников Отрада // и всех, поющих Всесильное Христово Божество.
Песнь 5
Утренююще к Тебе, Человеколюбцу, / воспеваем Тя, Христе Боже, // даруй нам милости Твоя.
Просвещал еси люди, отче Константине, / постоянен быв в делании учительства и милосердия, // темже похваляем пастырския труды твоя.
Молитися доблественне обучил еси ум и сердце / долголетным престолу Христову предстоянием, // и тако, во броня веры оболкся, исшел еси на страдания твоя.
Подвиги многоусугубил еси во дни бедствий военных, / огнь пылающ, Андроника архипастыря имея наставника, // емуже подражательна бысть еже о Бозе ревность твоя.
Богородичен: Аще не пойдеши с нами, яко Взбранная воевода, / Мати Дево, светлости Твоея молниею враги устрашающая, // не возможем я одолети, но яви нам милости Твоя.
Песнь 6
Ризу мне подаждь светлу, / одеяйся светом, яко ризою, // Многомилостиве Христе Боже наш.
Святых Земли Русския в годину скорби призывал еси усердно / привлещи к покаянию разоршия Христовы заповеди, // иерею Константине, добрый пастырю наш.
Во езере образа Николы Сергинскаго явлению чудящиися / свяшенницы церкви Крестовоздвиженския и вси люди укрепляхуся, воспевая: // сохраним в годину бедствий Православную веру нашу.
Святых архиереев Андроника и Феофана / самовидче и собеседниче явился еси, // иерею Константине, в скорбех помощниче нам.
Богородичен: У Креста предстоящи, Дево Пречестная, / и скорбь на радость Воскресения приложити чающи, // первая прияла еси целование Воскресшего Сына Твоео и Бога нашего.
Кондак, глас 6
Кроткое верных утешение, / милостивый молитв наших услышателю, / пастырю добрый, отче Константине, / первых мученик Пермских сопричастниче / Сергинския веси похвало и радование, / подаждь всем с верою к раце мощей притекающим // очищение, и исцеление, и велию милость.
Икос
Братство Христово, храму Воздвижения Креста Честнаго прилежащее, / пастыри и мужи благочестивыя / яти быша в годину брани междоусобныя и в темницу заключаеми, / яко защитницы святыни православныя, / мы же мужеству их дивящеся, / возопиим благодарственно: / о святии сродницы наши, / веси Сергинской украшение, / Пермския земли молитвенницы, / яко мученическое дерзновение имущии, / испросите нам у великодаровитаго Бога // очищение, и исцеление, и велию милость.
Песнь 7
В начале землю основавый, / и небеса словом утвердивый, / благословен еси во веки, // Господи Боже отец наших.
В защиту храма Божия и святыни его / возвысил еси глас, отче Константине, глаголя: / поревнуем крепко стояти за имя Христа, // Господа Бога нашего.
Защитителие веры пред гонители явилися есте, / отче Константине со иереем Ананиею и чады духовными, / сего ради в темницу заключаеми сподобилися есте пострадати // ради Святыя Троицы, Бога отец наших.
Многи дни в неволе с сострадальцы пребывый, / пастырю добрый, отче Константине, / многи раны приял еси, яко един от древних мучеников, // свидетелей веры в Господа Бога отец наших.
Богородичен: Марие Безневестная, Пречистая, / раны отирающая и язвы врачующая людем Твоим, / новых мучеников утешала еси, твердо страдавших // за Христа, Сына Твоего и Бога нашего.
Песнь 8
Царя Небеснаго, / Егоже поют вои Ангельстии, // хвалите и превозносите во вся веки.
Ангелы вознесоша на Небеса / иерея Константина и верныя, в Перми граде убиенныя, // да славят и воспевают Бога во веки.
Восплакашеся людие в годину междоусобныя брани, / многих мученик телеса в вертограде обретше, // и память сих обещаше хранити во веки.
Возвратися помале ко храму Креста / идеже святыми мощми своими, отче Константине, // яко страж сему неусыпающий во веки.
Богородичен: Расточенныя люди приведи, о Богомати, / у мощей укрепитися священномученика Константина, // славящее его во веки.
Песнь 9
Воспитанная во Святая святых, / и Рождшая Свет вселенныя, / Благодатная, радуйся, // песньми Рождество Твое величаем.
Упокоился еси до времене, идеже Святая святых, / храму своему Сергинскому и по смерти служа, / священномучениче Константине, // темже твое милостивое заступление величаем.
Обретоша благоговейно мо щи твоя / люди Пермстии, новомученик почитателие, / не может бо светильник под спудом крытися земным, // но да вси, свет его узревше, Светодавца Христа величаем.
Память святую твою, / свещею мученическою озаренную, / и мощей твоих обретение, отче Константине, // песньми немолчными величаем.
Богородичен: От икон Твоих, Богородице, святых, / исцеления приемлет вселенная, / мощи же за имя Сына Твоего пострадавших // точат милости, верными величаеми.
На хвалитех стихиры, глас 5:
Душу положивый за правду Христову, / за Церковь и веру Православную, / священномучениче Константине, / чистая жертва Богови явился еси, / яко служитель Его достойный, / крест священный на персех носивый честне, / и залог врученный сохранивый добре, / темже молим тя, // настави нас в путь истины шествовати ко спасению нашему.
В веси у гор Уральских во имя великаго Сергия / на Сылве-реце светлое торжество возсия / в памяти пастырей Константина и Анании с сострадальцы, / отсюду путь ко граду Перми предначинающих / на муки и на смерть за имя Твое, Христе Боже, / темже сих новомученик молитвами, / в лице святых Земли Пермския воспеваемых, // подаждь чтущим подвиги их велию милость.
Во узах горьких часа смерти ожидая, / взывал еси, священномучениче Константине: / Владыко Боже, Отче Вседержителю, / Господи Сыне Единородный Иисусе Христе, / и Святый Душе, / помилуй мир, грехом погибающий, / укрепи нас мучения претерпети до конца, / гонителей наших привлецы к покаянию, / паству в вере утверди, / храм наш до скончания века сохрани, / мир Отечеству даруй, / душу в вечныя кровы приими. / Темже и мы, почитающии страдания твоя, о страстотерпче, // пути, к жизни вечней ведущия, возлюбити да потщимся.
Смотрением Божественным мощи твоя, в земли сокровеннии, / первее явишася сродником и другом твоим, / возвращеннии же во ограду церкви Креста Всечестнаго, / напоследок верными обретошася на поклонение, / сим же ныне предстояще, / чудесем Божиим удивляемся, / и твое милосердное заступление призываем: / священномучениче Константине, моли Христа Бога // подати нам грехов прощение и велию милость.
Слава, глас 3:
Предстояще раце твоей священней, отче Константине, молим тя, / испроси телесем нашим здравие и душам спасение, / младенцы и старцы поддержи, даждь немощным укрепление, / отроком ниспосли ко учению Христову прилежание, / отчаянныя облагодати надеждею жизни вечныя, / да новомученики наша стяжим други на Небесех, / с нимиже моли защитити земли Отечества нашего, / и люди спасти от бед и обстояний, // мощи бо твоя суть верным милость и веселие.
И ныне, глас той же:
Земли Пермския ликование, / образ Твой нам даровавшая, / Мати Божия, Владычице Всепетая, / приими умиленныя со слезами моления наша, / укрепи нас во испытаниих, свыше ниспосылаемых, / да новомучеником нашим подражающе, верными Христу пребудем, / Егоже моли защитити храмы Отечества нашего, / и к покаянию привести заблудшия, // Ты бо еси нам Похвало и Утверждение.
Славословие великое и отпуст.
На литургии
Блаженны песнь 7-я и 9-я.
Прокимен, глас 7: Честна пред Господем / смерть преподобных Его.
Стих: Что воздам Господеви о всех, яже воздаде ми.
Апостол к Римляном, зачало 99.
Аллилуия, глас 6: Священницы Твои облекутся в правду, и преподобнии Твои возрадутся.
Стих: Бог нам прибежище и сила, Помощник в скорбех, обретших ны зело.
Евангелие от Луки, зачало 106.
Причастен: В память вечную будет праведник:
Молитва
О пастырю добрый, священомучениче отче Константине, услыши люди земли Пермския, раце мощей твоих предстоящия! Вемы бо тя, яко усерднаго учителя и проповедника веры Православныя и к тебе прибегаем яко отцу, сострадательному и милостивому. Услыши убо глас моления нашего, дерзновение бо велие имаши ко Господу, яко мученик долготерпеливый и иерей благоговейный. Весь игумена земли Русския еже о Господе подвижнически прославивый.
В годы войн, глада и бедствий подвизавыйся, научи и нас в бури тяжких испытаний, не погибнути в потопе волны греховныя. Настави нас чады быти Бога всесильнаго, видимыя же и невидимыя враги побеждающаго.
В житии твоем явивыйся древних святых почитатель, будущих же священномучеников показавыйся самовидец и послушник. Помози и нам в подвизех угодников Божиих образ спасения обрести.
Ревностию о храме твоем и святынех его движим, небоязненно глас в защищение оных воздвигл еси, и за сие с сослужителем иереем Ананиею и паствою твоею за веру пострадал еси, помолися о нас, да возможем стояти во истине православней и тако постом, доброделанием и молитвами, преплывше моря житейскаго великую пучину, в тихое пристанище достигнем и сретим Господа Бога, в Троице воспеваемаго, во веки веков. Аминь.