Собору Пермских святых
НА ВЕЛИЦЕЙ ВЕЧЕРНИ
На Господи воззвах на 8
Глас 1, подобен: О дивное чудо.
О, дивное чудо! / Светильницы веры Христовы / в земли нашей древле являются / и мрак языческий словом веры разгоняют. / Веселитеся горы и леси Прикамстии, / реки Уральския, волнами восплещите, / гради и веси, с нами воспойте, / великаго Стефана имуще первосвятителя:/ благодатная земле Пермская, радуйся, / сонм бо святых в тебе явися, / иже Бога молят душам нашим ниспослати // благодать и велию милость.
Дивны Твоя тайны, Христе Боже, / землю Пермскую освятивый / крещения банею и молитвами избранных Твоих, / ихже воздвигл еси, яко сосуды Духа Святаго: / Герасима, веры ревнителя / и Питирима, Чердыни крестителя, / по сих же Иону, Перми великия апостола, / иже венцем правды украшеннии воздвизают ны воспети: / благодатная земле Пермская, радуйся, / сонм бо святых в тебе явися, / иже Бога молят Церкви нашей даровати // благостроение и велию милость.
Святых земли Пермския память празднуем, / святителей Антония, Маркелла и иных, веру возрастивших, / Трифона преподобнаго и того стопам последовавших, / храмов здателей и благочестия ревнителей; / возрадуимся ныне, вернии, / о Божественней славе сродник наших красящеся, / к нимже припадаем с любовию, / древним и новым угодником единеми усты зовуще:/ благодатнии заступницы наши, радуйтеся, / и молитву Христови вознесите / даровати стране нашей мир, // и крепость, и велию милость.
Ины стихиры, глас той же.
Начало ныне положим, о братие, / молением теплым к новым мучеником и исповедником Пермския земли, / на нихже пророчество святаго праведнаго Иоанна исполнися, / видевша знамение Креста над Пермию грозное, / возвещающее многая тем страдания, / сего ради к ним возопиим благодарственно:/ о, соборе святый и полче Божественный, / о, страстотерпцы, чаши Голгофския со Отечеством приобщившиися, / страшныя муки прежде и паче всех приемшии, // укрепите и нас веру до конца сохранити.
«Не прикасайтеся помазанным Моим», рече Господь, «и во пророцех Моих не лукавнуйте»; / сия словеса гонителие веры поправше, / не точию помазанныя Божия плениша, / но и смерти горцей со чады юными, со сродники и слугами предаша, / не точию иноков и пастырей не послушаша гласа, / но огнем, мечем и водою я погубиша; / мы же таковому безчеловечеству ужасающеся, // прославляем светоносное страдальцев Христовых безсмертие.
Творяй Ангелы Твоя духи, Господи, / и слуги Твоя пламень огненный, / духа исполины в роде человечестем воздвигл еси, / ревностию огненною проповеди веры служащия, / от нихже просиявают в земли Пермстей во времена последняя / святители Андроник и Феофан / во образ братския любве и единомыслия, / иже мучения за любовь Христову претерпеша, / ов еще жив сый в земли беззаконными погребеся, / ов же множицею мучим прият в воде истопление, / но яко дерзновение имуще, / молятся за ны, да живот имамы и лишше имамы: // Дух Святый и огнь Троическия веры.
«Господь мне помощник, и не убоюся, / что сотворит мне человек?» / псаломски глагола преподобный Варлаам со отцы белогорскими, / на смерть от рук злочестивых уготовляяся, / никтоже бо возможет от Христа отлучити веры ревнителя, / ученьми и житием землю Пермскую обогативша, / емуже слово Божие пища бысть, и питие и жизнь. / Темже и мы на гору восходяще, Афону тезоименную, / не снегом, но благодатию преподобных мученик убеленную, / Помощника и Покровителя прославим, в Троице певаемаго, // рукою крепкою ко спасению нас возводящаго.
Алчуще и жаждуще, и душа их в них исчезе, / и воззваша ко Господу, внегда скорбети им, / земледелателие края сего, / яко раби к сечению древ без вины осужденнии, / и пришельцы, долгопутное течение претерпевшии, / в горьких же работах изнемогшии, / но тии аще и телом мучителем поработишася, / душу свободну от врага губителя соблюдоша, / посреде злобы незлобием ю украсивше, / и молитвою просветивше, / ихже предстательством, Христе Боже, // рабства горькаго греховнаго свободи нас.
Слава, глас 8:
О, Российская страно великая, / издревле православием освященная/ и Державою светле именуемая, / плакахуся о тебе пред годиною горькою/ семья Царская со сродницею преподобною Елисаветою, / пророчества святых, яже о тебе ведущи, / обаче уготовишася и не смутишася избранницы Божии, / и достойно смерть мученическу в пределех пермских обретоша, / ведуще, яко не может Русь Святая погибнути, / сонм молитвенник имущая // пред престолом Царя Небеснаго.
И ныне, глас тойже, догматик: Царь Небесный.
Вход. Прокимен дне. И чтения три
Пророчества Исаиина чтение (глава 43):
Тако глаголет Господь:/ вси языцы собрашася вкупе, / и соберутся князи от них./ Кто возвестит сия в них?/ Или, яже от начала, кто слышана сотворит вам?/ Да приведут свидетели своя, и оправдятся, / и да услышат, и да рекут истину./ Будите Ми свидетели, / и Аз Свидетель, глаголет Господь Бог, / и отрок, егоже избрах./ Да познаете и веруете Ми/ и разумеете, яко Аз есмь, / прежде Мене не бысть ин Бог, / и по Мне не будет./ Аз есмь Бог, / и несть, разве Мене, спасаяй./ Аз возвестих и спасох, / уничижих и не бе в вас чуждий./ Вы Мне свидетели, / и Аз Господь Бог, и еще от начала Аз есмь, / и несть от рук Моих избавляяй./ Сотворю, и кто отвратит то?/ Сице глаголет Господь Бог, / избавляяй вас Святый Израилев.
Премудрости Соломоновы чтение (глава 3):
Праведных души в руце Божией, / и не прикоснется их мука./ Непщевани быша во очесех безумных умрети, / и вменися озлобление исход их./ И еже от нас шествие сокрушение, / они же суть в мире. / Ибо пред лицем человеческим, аще и муку приимут, / упование их безсмертия исполнено./ И вмале наказани бывше, / великими благодетельствовани будут, / яко Бог искуси я/ и обрете их достойны Себе./ Яко злато в горниле, искуси их/ и, яко всеплодие жертвенное, прият я./ И во время посещения их возсияют/ и, яко искры по стеблию, потекут./ Судят языком и обладают людьми, / и воцарится Господь в них во веки./ Надеющиися Нань разумеют истину/ и вернии в любви пребудут Ему, / яко благодать и милость в преподобных Его/ и посещение во избранных Его.
Премудрости Соломоновы чтение (главы 5 и 6):
Праведницы во веки живут, / и в Господе мзда их, / и попечение их у Вышняго./ Сего ради приимут Царствие благолепия, / и венец доброты от руки Господни:/ зане десницею покрыет я, / и мышцею защитит их./ Приимет всеоружие рвение свое, / и вооружит тварь в месть врагом./ Облечется в броня правды, / и возложит шлем, суд нелицемерен./ Приимет щит непобедимый, преподобие./ Поострит же напрасный гнев во оружие;/ споборет же с ним мир на безумныя./ Пойдут праволучныя стрелы молниины, / и яко от благокругла лука облаков, на намерение полетят./ И от каменометныя ярости исполнь падут грады, / вознегодует на них вода морская, / реки же потопят я нагло./ Сопротив станет им Дух Силы, и яко вихор развеет их, / и опустошит всю землю беззаконие, и злодейство превратит престолы сильных./ Слышите убо, царие, и разумейте, навыкните, судии концев земли./ Внушите, держащии множества, и гордящиися о народех язык, / яко дана есть от Господа держава вам, и сила от Вышняго.
На литии, стихиры.
Глас 1:
Подобаше самовидцем Слова и слугам, / и еже по плоти Матере Его успение видети; / святии же Пермския земли, / Успения Пречистыя праздник зело возлюбивше, / храмы Богородице воздвигоша, / и себе самех яко храмы духовныя явиша. / Темже и мы Божественным промышлением в память их собравшеся, / благодать их богатно почерпаем, / покрова же сподобляемся Превышшей херувим: / и образу Собора святых наших покланяемся, // яко молящихся о душах наших.
Глас 2:
Небес жителей сущих, / святыя земли Пермския днесь прославим, / в преподобных славнейшия, и во иереех честнейшия, / Присносущнаго Сына Отча проповедники, / премногих подвигов и страданий ради венцы приявшия, / ихже память празднующе единодушне, / неизреченныя радости исполняемся, // даруют бо нам велию милость.
Глас той же:
Христа непорочныя невесты / души ваша нарекошася, / вы же сродницы бысте Сына Отча, / яко слово Того соблюдшии, / и души своя Тому в жилище уготовивши. / Днесь в пресвятую вашу память сошедшеся, Творца прославим, / давшаго нам сонм защитителей Пермския земли, / к животу от смерти грешныя приводящих, / верныя же просвещающих неприступным Светом, // спасения упование подающих душам нашим.
Глас 3:
Приидите, вси концы земли Пермския, / честное торжество Собора угодников наших восхвалим, / в руце бо Божией души своя яко непорочныя положиша. / Темже и мы по Бозе и Богородице сих предстатели стяжавше, / во псалмех и пениих и песнех духовных, // со Предтечею и всеми святыми им да празднуем светло.
Слава, глас 5:
Приидите, празднолюбных собор, / приидите и лик составим, / приидите, венчаим песньми Церковь, / в памяти всех святых угодников Пермския земли, / днесь бо небо кропит веселие, / облагодатствуя сердца сошедшихся в праздник настоящий: / и страна Стефанова исполняется жизни, / храмов Божиих украшающися благолепием. / Ангели с сонмом святых лик составляют, / удел свой назирающе и коегождо потребу на пользу. / Священницы руце молитвенно к ним простирают, / вернии покланяются, глаголюще: / «Сродна присвоения не забудите, отцы и матери, братия и сестры наши, // верно празднующих всесвятое ваше торжество».
И ныне, глас тойже:
Воспойте, людие Пермстии, Матери Божией, воспойте: / Рождество почтите от неплодове и во храм Господень Вхождение, / Успению почудитеся, како всесветлую душу в пречистыя длани Сына предает: / Егоже и молит непрестанно, // даровати земле нашей мир, и велию милость.
На стиховне стихиры воскресны.
Слава, глас 6:
О, святии Пермския земли, / Прикамия орли небопарнии, / гор верси небосветлии, / рек струи благодатныя, / пророчества Исаиина исполнение сущии, рекшаго: / «Людие ходящии во тьме узрят свет велий, / и живущим во стране и сени смертней возсияет свет». / Се свет веры вашея, / се просвещение душ наших, / темже и доныне моляще не престайте // прощение прегрешений даровати почитающим вас.
И ныне: Творец и Избавитель.
Аще во ин день, кроме недели,
на стиховне стихиры святых, глас 2.
Подобен: Доме Евфрафов:
Красуется дебрь Вычегодская, / святителей триех мощми и проповедию Стефановою, / ихже ради Пермь Великая, / край богатый верою нарицается, // яко велий сонм святых возрастившая.
Урала камень самоцветный, / Чердынь защитники древния и новыя почитает, / яко родителем дщерь, любовь изливающи, / апостолом любве научаема, // благолепие святости добре хранити.
Пермския земли всех градов и весей молитвенницы, / Кунгура священномученицы, / и Соликамска страдальцы мнози, / Вишеры и Ныроба краесветнаго юзницы // достодолжно да почтутся.
Слава:
Воды живоносныя жила неизсякаемая, / Кама великая явися, / на брезех своих грады напоившая, / да возрастят святых множество, // ихже Собор прославляем.
И ныне:
Церквами Успения Твоего Пермь украсившая, / Соликамску Знамение веры явившая, / Кунгур иконою Тихвинскою освятившая, / в Чердыни Владимирский образ, по миру шествовавший, прославльшая, // спасай, Мати Божия, край наш Тебе почитающий.
Тропарь, глас 5:
Благоукрашается Церковь Русская, / земля Пермская ликовствует/ в памяти преславнаго лика святых своих, / словом и житием Богу угодивших, / имже мы благодарственно взываем:/ о, древнии и новии подвижницы веры православныя, / ови апостольския труды понесшии, / ови же кровьми мученическими веру утвердившии, / велицыи заступницы и хранителие, / молите Христа Бога// душам нашим в мире спастися.
НА УТРЕНИ
По 1-м стихословии седален, глас 4.
Подобен: Скоро предвари:
Скоро предваряете прошения наша, / новии мученицы и исповедницы Пермстии, / яко врачеве сострадательнии и милосерднии, / яко отцы и матери попечительнии, // присно молящиися о душах наших.
Слава и ныне, Богородичен:
Обновила еси, Чистая, Божественным Рождеством Твоим / истлевшее во страстех земнородных мертвенное существо/ и воздвигла еси вся от смерти к животу нетления./ Темже тя по долгу блажим вси, Дево Препрославленная, // якоже прорекла еси.
По 2-м стихословии седален, глас 4.
Подобен: Удивися Иосиф.
Удивляемся, терпение и смирение ваше зряще, / в словесех и делех ваших благодарно поучаемся, / края нашего богодарованнии заступницы, веры учителие, /и к пению любовию воздвизаеми, радостно взываем:// о, новомученицы и исповедницы земли Пермския, с нами неотступно пребывайте.
Слава и ныне, Богородичен:
Удивися Иосиф, еже паче естества зря, / и внимаше мыслию иже на руно дождь, в безсеменном зачатии Твоем, Богородице, / купину огнем неопалимую, жезл Ааронов прозябший, / и свидетельствуя обручник Твой и хранитель священником взываше:// «Дева раждает, и по рождестве паки Девою пребывает».
Величание:
Величаем вас, / вси святии земли Пермския, / и чтим святую память вашу, / страну нашу светом Евангельским озарившии // и жизнь за веру во Христа положившии.
Псалом избранный: Бог нам Прибежище и Сила:
По полиелеи седален, глас 8.
Подобен: Повеленное тайно:
Повелением благодати наставляеми, / веру превыше всех богатств предпостависте, / учаще люди небоязненно / о Бозе Вседержители, сотворшем небеса, / Егоже имене ради многая страдания претерпесте, / но яко непобедимии, престолу Его предстояще, / поминайте поющих вам: // радуйтеся, новомученицы и исповедницы земли нашея.
Слава и ныне, Богородичен:
Повеленное тайно приим в разуме, / в крове Иосифове тщанием предста безплотный, / глаголя Неискусобрачней:/ «Приклонивый схождением Небеса, / вмещается неизменно весь в Тя, / Егоже и видя в ложеснах Твоих, приемша рабий зрак, / ужасаюся звати Тебе:// радуйся, Невесто Неневестная».
Прокимен и Евангелие воскресныя.
Канон новомучеников, глас 8
Песнь 1
Ирмос: Колесницегонителя фараоня погрузив, / чудотворяй иногда, / Моисейский жезл крестообразно поразив, / и разделив море, / Израиля же беглеца пешеходца спасе // песнь Богови воспевающа.
Припев: Святии новомученицы и исповедницы земли Пермския, молите Бога о нас.
Мрак языческий в водах светлых погрузив, / чудотворяй иногда, / Стефанов жезл идольское древо порази, / святителие Герасим, Питирим и Иона веру насадиша, / Антоний же и Маркелл поты трудов пролиша, // да пермяне и зыряне чтут Бога, благочестие возращающаго.
Триех обителей есть похвала Трифон преподобный: / в Пыскорстей трудов монашеских делатель изрядный, / Успенския на Чусовей реце строитель преизящный, / другия Успенския в земли Вятстей чудотворец неусыпный, / темже в лике Пермских святых того величающе, // песнь наставнику монахов воспеваем.
Пастырь кронштадтский над Пермию узре / знамение грозно: / мрачный облак крестообразно распростерт, / рода Царева и Царства православнаго погубление являющ, / но чада ея, яко мученицы// песнь Богови воспевают.
Аще и ят бысть от беззаконных святитель Андроник, / подвизаяйся земли ради Пермския, / но пастырским жезлом сию крестообразно освятив, / гроб землен, яко чертог, рукама своима священныма себе уготови; / темже девством и мучением просиявый вкупе, // песнь Богови воспевает.
Сынове Церкве, послушания чада, / Собором Всероссийским посланнии, в Пермь притекоша, / дабы истину познали и возвестили о убиении архипастыря ея, / но и тыя безбожными умученныя помянем, братие: / Василия епископа, священноинока Матфея и Алексия хлебопашца, // песнь Богови ныне во славе воспевающия.
Кама великая содрогашеся, / приемлющи во глубину святителя Феофана со иноки белогорскими, / со пастыри пермскими Алексием, Иоанном, Николаем и иными многими, / и земля при пути Сибирстем колебашеся, / в нейже священницы Алексий, Александр, Константин и Григорий упокоишася, // ихже память ныне совершаем.
Храмов Божиих от лжеобновителей защитницы / и тайнии окормителие верных, / Христова крестнаго пути подражателие да почтутся, / с нимиже сестры о Господе прославятся вкупе, / яже приношеньми своими от глада и болезней во узилищех многи спасоша, // во истощании ближних ради песнь новую воспевающе.
Богородичен: В молитвах неусыпающую Матерь Света, / град Пермский чтит во образех и храмех своих, / и дщерей своих приводит уневестити Христови, / во обитель славнаго Успения Ея, / да молитвою неусыпною землю нашу освящают, // песнь Богови воспевающе.
Песнь 3
Ирмос: Жезл во образ тайны приемлется, / прозябением бо предразсуждает священника, / неплодящей же прежде Церкви / ныне процвете древо Креста // в державу и утверждение.
Кто испишет страдания мученик Пермских: / иереев Николая и Александра Култаевских мечное разсечение, / Александра Краснослудскаго в Чусовей реце утопление, / Петра Сретенскаго во дворех дома убиение, // веси Троицкия на Сылве честных христиан во главу усечение?
Град малый Кунгур плач велик вседомовен подъемлет, / цвет бо его мучителие повсюду горце вырывают, / и отводят на смерть лютую пастыри добрыя Владимира и Павла, / с нимиже лучшии граждане ко граду лучшему небесному // мученичеством совершают прехождение.
Крестницы Ермаковы кунгурстии жителие бывше, / землю наследствованную от древних крамольник спасоша, / новыя же, праведныя убивающия, не одолеша: / имиже в саде Пермстем чада Церкве со отцы духовными Ананиею и Константином // прияша от оружных устреление.
Апостол, от рыбарей галилейских призванных преемники / почитает Оханск, мрежа рыбарская: / умученныя пресвитеры Николая, Петра и Симеона, / Алексия, Иоанна и ины страдальцы, / еще же иерея Павла и диакона Григория, коньми по злобе мучителей растерзанныя, // священника Владимира, от новорожденна первенца ята на убиение.
Край Осинский житница есть святых мучеников, / в нихже юнейший Александр священнострадалец да поется, / вкупе со иереи Виктором, Петром и Валентином, / такожде узы и смерть Димитрия Троицкаго да помянутся, // тии бо класи зрелии Господни нашего спасения.
Красноуфимск, казаков крепость, паче укрепися, / мощми мученик, иже в храме Святыя Троицы, / священников Алексия, Льва и Александра, / с нимиже священномученик Антоний и мученик Афанасий стражие града нашего явишася // и воинов духовных утверждение.
Похвала подобает всем верным, / лжеобновление Церкве не приявшим, / и память вечная во узах и изгнании страдавшим, / и в лето тридесять седьмое убиенным, // пермских градов и весей украшению.
Богородичен: Управи стопы наша во спасение, / Мати Божия всечестная, / краю Пермскому Путеводительнице, / просвети лице Твое на ны и подаждь нам крепость, // державу и утверждение.
Седален, глас 3.
Подобен: Божественныя веры.
Божественныя веры проповедницы, / Утешителя теплотою разжженнии, / святии Пермския земли досточуднии, / яко свещи горящия путь нам озаряете./ Темже днесь память вашу чтуще, // просим молитвами вашими велия милости.
Слава и ныне, Богородичен:
Божественная скиния была еси Слова, / едина Пречистая Мати Дево, / утешительница в скорбех сущи, / гонимым за Христа всегда помогаеши, / и в жажду водами молитв Твоих Божественных напояеши, // подающи им милость.
Песнь 4
Ирмос: Из горы приосененныя, Слове, пророк, / Единыя Богородицы, / хотяща воплотитися боговидно усмотри // и со страхом славословяше силу Твою.
От горы снегосветлыя излияшася Твоя, Слове, лучи, / селением, окрест стоящим, / сего ради Белою наречеся и Афоном Уральским, // яко день и нощь славословящая силу Твою.
Воевода Твой и монахов, Слове, глава / Варлаам преподобный явися, / вся люди с собою на гору возводяй, // да со страхом и любовию славят силу Твою.
Творящия нам доброе благодетели, Слове, нарекл еси, / кое же добро паче молитвы инока и алтаря служителя? / и како простреся рука нечестивых заклати иноки белогорския, // пермян благодетели, дружину Твою?
Строгому белогорцев житию строжайшее, Слове, приложиша / скита Серафимова жителие, Цесаревичу Алексию тезоименнаго, / егоже сродницу преподобную Елисавету, мученичество приимшую, // во Иерусалиме упокоити скитоначальник с любовию потрудися во славу Твою.
Сияние блистания Твоего, Слове, прият / Фавор, иже в земли Галилейстей, / но сему поревноваша Пермскаго Валаама насельницы // в стране своей и чужедальних явившии славу Твою.
Многотрудное раба Божия Василия к Тебе, Слове, обращение / великаго подвижника Варлаама сего содела, / венцем бо сугубым увенчанный, яко инок и мученик, // на небесех со ученики многими славит силу Твою.
«Трудом и подвигом обитель Белогорская, о чада, создася», / глагола добрый архипастырь Андроник иногда, / «сия да будет православным во утешение, // во славу Церкви Христовой, на украшение ея».
Богородичен: Чудный Твой образ Иверский, Богомати Владычице, / иноцы белогорстии зело возлюбивше, / Вратарницу Тя Белыя горы поставляют, якоже Афонския, // уповающе на заступление Твое.
Песнь 5
Ирмос: Утренюет дух мой к Тебе, Боже, / зане свет повеления пришествия Твоего, / имиже убо озари ум наш, Владыко, // и настави на стезю жизни.
Древний севера град на семи холмех воспевает, Боже, / на Колву реку пришествие Питирима, святителя Твоего, / иже трудов проповеднических и мученичества не отречеся, // да Камы верховия наставит на стезю жизни.
Кто позна Чердыни столицею быти и в веках слыти? / Ионою святителем дом княжий крестися и град рождение прият духовное, / в немже воспиташася защитницы вернии и мученицы доблии, // наставляющии ны на стезю жизни.
Во граде мале обитель Уральскую первую создавый, Боже, / явил еси о нем благость попечения Твоего, / апостолу Тебе возлюбленну Чердынь препоручил еси, // да богомолие ея не оскудеет, всех наставляя к жизни.
«Аще на казнь отведемся, воспоем Христу Воскресшему», / тако узники иерей Божий Евграф утешаше, / в темницу же паки заключен, ближних не чает видети, // обаче с сыном мученичества сподобляется и вечныя жизни.
В Чердыни рожденный, в той и послужил еси, / священномучениче Александре, волков льстивных отгонителю, / в Чермозе в годину тридесять седьмую скончал еси служение земное, // прешед стезею смерти горькия к жизни.
Ныроба древняго повесть услышим, / предначальника рода царскаго страдание почтим, дивящеся, / како Зачердыние прекрасное в мучилищный стан обратися, // и безпутие снежное в стезю вечныя жизни.
Обители Успенския, еже в Чердыни, благолепие, Боже, / проразсудил еси явити сестрам ея в крае восточнем, / страну Китайскую озарив, Владыко, // в нейже сущая чада Российская наставляя к жизни.
Богородичен: Лик Твой древний, зело возлюбленный на Руси, Богомати, / образ Владимирский обитель Чердынскую облагодати иногда, / отонуду шествие начат с сестрами ея вкруг мира всего, // но паки возвращся, край наш возставляет к жизни.
Песнь 6
Ирмос: Воднаго зверя во утробе / длани Иона крестовидно распростер, / спасительную страсть проображаше яве; / тем тридневен изшед, / премирное воскресение прописаше / плотию пригвожденнаго Христа Бога // и тридневным воскресением мир просвещшаго.
Вещь добру соль нарече Господь иногда, / ейже тезоименит добровидный град создася, / и украсися каменных церквей венцем белоснежным, / в нихже слово правды, свыше осоленное, / доныне проповедуется, / и славится Имя за ны распеншагося Христа Бога, // тридневным воскресением мир просвещшаго.
Трудом и молитвою овеяни быша / градцы мали Орел и Нижнечусовский, / острожцы, селения и острови по Каме-реце, / тии бо засечною чертою от враг ограждени, / казачию славу восприяша и славу святых, / наипаче же новых мученик, // кровию своею проповедающих мир Просвещшаго.
В леде воднем, яко во оковах, / не длани связанныя, но ум ко Спасу вознося, / святитель Феофан страсть Христову в себе проображает, / добр пастырь и юным наставник, / Соликамска предстатель и Перми заступник, / бездыханен, беззрачен водою погребается, // но тридневным Воскресением Сына Божия мир просвещает.
О, ужасныя повести кончины твоея, / священномучениче соликамский Михаиле! / Чудом Божиим по убиении жив являешися, / таже убийцами кающимися с места казни изранен ведешися, / иже жителей окрестных призываху помощь подати, / но тии, страхом одержими, милосердия отрекаются, // паки смерть тебе молчанием своим подписующе.
Человекоубийцы зверя служителие / пред всеми людьми соликамскими, / жертву идолу безбожия приносят Николая иерея Таманскаго, / диакону же Вячеславу с поющими повелевают / ров ископати погребению своему, // но тии светом Гроба Живоноснаго мир просвещают.
Михаил и Александр, священницы Майкорстии, / раны Христовы в мученичестве прообразиша, / егоже и Александра два, Пожвенский и Ленвинский, сподобишася, / вземше в руку десную крест, / и Бога распинаема смерть прописавше, / но Воставший тридневно яко всесилен, // совоскресит с Собою именем Его мир просвещшия.
Града Соликамска украшение, / яже во славу Троицы Святыя церковь, / безпесненна, беззрачна в скорбь погрузися со иными храмы града нашего, / егда узилища в них устроишася лютая, / окрест же могилы, юзником общи, / якоже и судьба людем Российским, присным Христу, // тридневным воскресением мир просвещшему.
Богородичен: Знамение милости Твоея яви нам, Дево, / якоже древле отцем нашим благочестивым, / иже поля обхождаша со крестом святым и иконою Твоею, / благословения чающе трудом своим улучити, // сице призри на ны, труждающияся Воскресшаго ради, // и помощь ниспосли, благодатию просвещающи.
Кондак, глас 5:
Радуйся, Пермская земле, / память святых твоих празднующи, / православия благовестников уделе светоприемный, / святителей ниво плодоносная, / в тебе Уральский Афон возсия, преподобных жилище, /в тебе Голгофа вознесеся новых мученик, / ихже мощей ради яко антиминс распростертый зришися. / Темже и мы заступником нашим взываем: / о, святии избранницы Божии, / веру, смирение и братолюбие в нас умножите, / в покаянии и благочестии утвердите, // да спасение улучим и велию милость.
Икос
Да возрадуется всяк град земли Пермския, / память святых своих празднуяй, / и да воззовет к ним, вся именованныя именуя, / безыменным же благодарно честь воздая, / и да возвеличит подвиги их и болезни многия, / яже за имя Христово претерпеша. / Мы же, старцы и младенцы, мужие и жены, / девы и юноши, монаси и священницы, / песнь едиными усты новым мученикам и исповедникам земли Пермския поем: / о, соборе избранный и полче Божественный, / чистоты рачением души наша обновите, / на подвиг во имя веры укрепите, // да спасение улучим и велию милость.
Песнь 7
Ирмос: На поле Деире иногда мучитель / пещь постави на мучение богоносных: / в нейже три отроцы песнословяху Единаго Бога, / троично воспеваху, глаголюще: // «Отцев Боже, благословен еси».
Посреде гор Вишера могутством вод красуется, / земледелателие же от весей дальних на бреги ея / силою мучителей привлачими, / скорую смерть в тяжких работах провидевше, / пети не отвергошася: // «Отцев Боже, благословен еси!»
Пармы и Велса, Каменки же и Песчанки воспомянем страдальцы, / мужи и жены, старцы и болящия, младенцы и отроки, / в разселинах гор нашедшия от горьких трудов упокоение вечное, / и крест един свидетель о многих, посреде скорби взывавших: // «Отцев Боже, благословен еси!»
От Кизела и Вишеры в Пермския концы беда исткася яко паучина: / ко древ сечению руки немилосердных влачаша, / нив русских и храмов служители верныя, / обаче гладом, мразом, работою губительною смерть приявше, взываху: // «Отцев Боже, благословен еси!»
О, души человеческия бездна! / Како жителие брегов Вишерских нечаянныя гости юзники сретаху? / Нецыи милости ради чадом их плачущим укрухи хлеба приношаху, / инии же за хлеб мучительск беглецев ловяху, яко за Иудины сребреники, // но всех нас вразуми, Боже, яко благословен еси.
Иерусалима благодать и Афонския горы / ликом светлым яви Кукша преподобный, / егда станов страданий гражданы, иже в Предуралии, утешаше, / темже Киева, Почаева, Одессы осияние быв, взываше: // «Отцев Боже, благословен еси!»
Земля, хладом окованная, телеса многих страдальцев прияше, / души же их не возможе удержати; / аще и скончаша зде житие Серафим инок и пресвитер Илия, / но ов болезнию, ов же огнем рая достигше, воспевают: // «Отцев Боже, благословен еси!»
Жен-мироносиц сословие украсившая, / мученица Татиана да почтится, / питающая страдальцев телесне и дух их бодрым словом возвеселяющая, / на Вишере пострадавшая и на голгофу Бутовскую возшедшая, взывающи: // «Отцев Боже, благословен еси!».
Богородичен: При Кресте со учеником возлюбленным Христовым, / Матерь Божия к Сыну руце простирает, / умоляющи помиловати мир, / и спасти души верно взывающих: // «отцев Боже, благословен еси!»
Песнь 8
Ирмос: В пещи ликование поставиша отроцы, / сочиненный чин приимше, / твари повелевающе славити вседетельную премудрость, / Христа воспевающе: // «Благословите, вся дела Господня, Господа».
На Руси благочестие утвердиша князие и святители ея, / людие же без крове тое прияша, / ваша же кровь, мученицы новии, семя Церкве Русския явися, / жесточайшая бо страдания в земли Пермстей претерпесте, поюще: // «Благословите, вся дела Господня, Господа».
В Пермстей земли краесветней, православие крепце держащей, / лютейша брань по убиении цареве явися; / аще же и глагол мучителев тогда превозможе, / но яже внутрь сердца молитву Богу кто может возбранити зовущим: // «Благословите, вся дела Господня, Господа?»
Образ святыни из памяти людския изгладити / тщахуся властителие новии, / грады храмов и пастырей лишающе, / села вообществлением имений во узилища обращающе и возбраняюще пети: // «Благословите, вся дела Господня, Господа».
Веры свободу поработити не достигшии, / верных убити или рабами соделати повелевают, / темже в домы черною бедою мучители приходят, / во еже восхитити поющих: // «Благословите вся дела Господня, Господа».
Егда приидоша во отечество наше, полцы германстии, / тогда вси людие крепце врагу противосташа / и от Христа отпадшим воспомянуша, / яко чтити Бога подобает, // Владыку миру, Судию и Господа.
О, отечество многострадальное! / О, благочестия поборницы долготерпеливии! / Кия песни принесем ныне подвижником Пермския земли, / ихже ради сия процвете благодатию Христовою, воспевающи: // «Благословите, вся дела Господня, Господа»?
О, древни и новии Пермскаго края заступницы! / Приимите усердное моление наше, / и попецытеся о градех и весех возлюбленных вами, / да вера Христова в них царствует, всех воздвизающи пети: // «Благословите, вся дела Господня, Господа».
Богородичен: Отрада и утешение Ты еси верным, Богородице, / в печалех и скорбех услышание скорое, / сохрани град Пермь Тебе славящий, / со грады и веси земли нашея, согласно поющия: // «Благословите, вся дела Господня, Господа».
Песнь 9
Ирмос: Проявленное на горе законоположнику во огни и купине / Рождество Приснодевы, / в наше верных спасение // песньми немолчными величаем.
Просиявшую в горах Уральских нам во славе и светлости / память Собора богоизбраннаго Пермских святых, / в похвалу подвигов их и страданий // песньми немолчными величаем.
Не возможет дом на песце утвердитися, / ниже град или весь кроме праведника устояти, / темже и мы основание наше, пермских святых, // песньми немолчными величаем.
Идеже быша слезы, процвете благолепие, / идеже кровь пролияся, взыде благочестие; / тамо предстателем нашим молитвенно взываем, // песньми светлыми их подвиг величающе.
Идеже безбожие торжествоваше православных убиение, / новых мучеников Пермския земли, / ныне знамение веры возвышается, крест в поклонение верных, // да вси святых честную смерть величаем.
Именованныя и безыменныя в молитву Богу приводим, / явленныя же и неявленныя прославляем / вся святыя края нашего, // песньми немолчными величающе.
Днесь весна душам верных удела Стефанова, / зане солнцезрачный облак святых сей от бед покрывает / и храмы в нем воздвизати помогает, // да молящиеся в них пребудут, Бога величающе.
Церковь Русская вся с нами спразднует ныне, / во отечестве и разсеянии сущая, / слух бо святых Пермския земли во вся концы достиже, // темже вси песньми их Собор величаем.
Богородичен: Молим Тя, Благая Вратарнице, / двери райския верным отверзающая, / и нам рай отверзи молитвами святых земли нашея, // да с ними песньми Тя немолчными величаем.
Светилен.
Подобен: Духом во святилищи.
Духом с нами пребывающе, предстоите у престола Владычня со свещами светлыми, / мы же праздник ваш совершающе, песни светлыя вам воспеваем, // видехом бо очима в земли нашей торжество веры светоносное, людем Пермским во спасение.
Слава и ныне: Богородичен:
Слова пребезначальнаго Мати, неизреченною благодатию сияющая, / и мудрость верным подающая, свыше я озаряющи, // настави и нас о очищении душ потрудившеся, во свет Христов облещися.
На хвалитех, глас 5, подобен: Радуйся
Радуйся, святителей страны Пермския троице, / Герасиме, Питириме, Ионо, мощми Усть-Вымь украсившии, / со Стефаном чтимии, зырян и пермян апостолом, / и с наследники трудов проповедания веры, / со святители пермскими укрепляющими ю, / преподобными и незлобивыми, / иже скитающеся, труждающеся и служаще, / жизнь за Христа положиша, / Антоний и Маркелл, яко многотруднии, / Андроник же и Феофан, яко многострадальнии, / и инии, в гонениих корабль церковный добре правящии, / и во дни ослабы время мирно искупующии, / да почтутся, яко Христа молящии// подати нам велию милость.
Радуйся, мученик Пермских светлый облаче, / небо церковное сиянием украшающий, / венценосцы державнии, род царственный, / священницы, монаси и простии, / кровьми веру утвердившии, / мужеством верныя на подвиг укрепившии, / некия от мучителей к покаянию подвигшии, / благословляющии, но не клянущии, / уподобльшиися Христу о распинателех молящуся, / обличившии же упорствующих в нечестии своем, / правды Божия свидетелие доблии, / за люди земли отчия молитвенницы дерзновеннии, / яко избранницы Божии Того умолите // подати нам велию милость.
Радуйся, преподобных огнеросное ликостояние, / Белогорское братство, постом и бдением себе истончившее, / скита Серафимова подвижницы и пустыни Фаворския, / Чердыни пчелы трудолюбныя, / Соликамска и Кунгура молитвенницы неусыпнии; / радуйтеся, Перми и весей ея адаманти твердии, / иже в годину лютую стен монастырских лишеннии, / сами стена градом нашим явльшиися, / на Божественней стражи обнощь стояще, / на всяк день в окормлении овец расточенных труждающеся, / в заточении сущим пищу и одеяние подающе, / милостивым сердцем всем тепле состраждуще; / темже молим вас, Христа умолите // подати нам велию милость.
Радуйся, богохранимая Пермская земле, / многи подвижники воспитавшая, / многи и приявшая яко изгнанники и юзники, / мученьми на всяк день изнуряемыя, / ихже имена весть Господь Вседержитель, / праведных души в руце приемляй, / страданьми ризы своя убелившия, / во смирение скорбьми пришедшия. / Мы же чтуще память их, / дебри Ныробския и бреги Вишерския слезами оросивших, / Чердынскую и Березниковскую землю стопами измеривших, / в соликамских узилищах изгибших, / Христа молим от бед страну нашу оградити, // и явити людем ея велию милость.
Славословие великое. И отпуст.
Пред первым часом. Слава и ныне, стихира евангельская.
На Литургии
Блаженны глaса на 6 и святых песнь 9-я на 4.
Прокимен воскресен глaса, и святых, глaс 4: Святым, иже суть на земли Его удиви Господь / вся хотения Своя в них.
Стих: Предзрех Господа предо мною выну, яко одесную мене есть, да не подвижуся.
Апостол дне и святых: ко Евреом, зачало 330.
Аллилуарий воскресен гласа, и святых, глас 4: Воззваша праведнии, и Господь услыша их, и от всех скорбей их избави их.
Стих: Многи скорби праведным, и от всех их избавит я Господь.
Евангелие дне и святых: от Луки, зачало 106. Конец: В терпении вашем стяжите душа ваша.
Причастен воскресен, и святых: Радуйтеся, праведнии, о Господе, правым подобает похвала.
Молитва
О, святии сродницы наши, древнии и новии Пермския земли заступницы, первосвятителя Стефана наследницы, пламенней вере священномученика Андроника подражателие!
Кто возможет достойно воспети подвиги ваша? Кто поведает миру вся яже за веру Христову претерпенная вами?
Прославляюще память вашу и праздник ваш светло совершающе, благодарственное моление вам приносим.
Величаем святители, страну нашу от мрака языческаго к свету евангельскому приведшия и тайну вечнаго спасения пермяном поведавшия.
Воспеваем новыя мученики, кровьми своими холми, удолия и реки обагрившия и велие дерзновение ко Христу стяжавшия.
Почитаем Царственныя страстотерпцы, со сродники и други поношение и смерть в пределех Пермских приявшия.
Восхваляем архипастыри со пастыри, чад церковных укрепившия за веру Православную непоколебимо стояти противу обновителей льстивых.
Ублажаем преподобныя, из келий монастырских на скитания и смерть изгнанныя и молитвою места страданий облагоухавшия.
Воспоминаем и страдальцы, деннонощными мученьми в горьких работах и в темницах изнуряемыя и терпением врага победившия.
О, велицыи святии Пермския земли! Приимите моление наше, в похвалу вам приносимое, и молите о земнем отечестве вашем, яко дерзновение ко Господу стяжали есте.
Мы же с любовию припaдаем к вам, предстателем нашим и заступником, и тепле взываем: сподобите нас продолжатели быти делания вашего, любовию Божественною сердца верных воспламените, да доброе наследие оставим чадом церковным и Царства Небеснаго достигнем, идеже купно с вами прославим Отца и Сына и Святаго Духа, Троицу Единосущную во веки веков. Аминь.